VicksWeb upgrade Location upload ads trending
VicksWeb Aruba

Welkom bij VicksWeb™

Flag Counter

© 2016 VicksWeb Inc.

Over | Privacy | Hulp | Voorwaarden | Feedback | Beveiliging | Diensten

E grito di angustia di e prome pais independiente di region di Caribe
Source:  Diario Online
donderdag 17 oktober 2019 01:36

Exclusivo

Libertad tabata e grito di e pais mas rico di Imperio Frances

Saint Domingue awe ta e lagrima di Haitianonan gespart rond mundo 

ORANJESTAD(AAN)–Na 1804 independencia a wordo proclama na e posesion mas rico di Francia den region di Caribe y na mundo. Saint Domingue tabata nomber di e parti di Hispaniola, cu tabata bou dominio Frances.

Historia a haci e pais catibo di dolor humano. Impotente pa cambia e situacion na cas, un parti creciente di e poblacion di Haiti mester a bandona e isla pa bay traha rond mundo y asina manda placa pa sostene e necesidadnan di nan famia.

Organisacionnan mundial ta trata na alivia e miseria di e pueblo. E parti mas grandi di Haiti no conoce e luho di awa for di cranchi ni luz electrico.

E nivel di educacion, cu ta dicidi pa e posibilidad di desaroyo personal, ta sumamente abou na Haiti cu durante su historia a bira victima di fenomenonan natural manera horcan y temblor cu ta destrui e poco propiedad di e Haitiano.

Indice di enfermedad ta halto na e pais, cu AIDS y otro explosionnan di enfermedad tambe a pone riba mapa.

Na 1804 e poblacion mas pober di Haiti a culmina su lucha pa libertad for di colonialismo cu a wordo uni na libertad for di sclavitud.

E grupo mas pober di Haiti tabata e grupo mayoritario cu a wordo treci na e isla como catibo. E cantidad di esclavonan a sigui aumenta y reforsa e forsa di revolucion contra e forsa colonial y e grupo di hende di colo, cu tabata rasa mixto.

Na prome momento tabata liderazgo di Voodoo, e religion importa for di Africa, cu a dirigi e grito contra colonialismo y sclavitud.

Na momento cu Napoleon a baha e Rey di Solo di Francia, el a lansa su grito di “Libertad, Igualdad y Fraternidad,”. E grito a wordo capta pa e esclavonan cu tabata e mayoria grandi di poblacion.

Napoleon, cu a habri caminda pa revolucion republicano rond mundo, no a duna e poblacion di Saint-Domingue loke el a spera.

Haitianonan a uni cu Spaña y Inglatera contra Francia pero no a logra. Sanger a drama na e pais. E lucha sangriente contra Frances y e Haitiano di color cu tabata hende liber, a haci Haiti e prome pais independiente den Caribe.  E nomber Haiti a reemplasa Saint-Domingue.

Na man di lidernan Haitiano, Haiti a bira e pais mas pober den region di Caribe.

Den literatura pero tambe politica, hopi bes voodoo ta wordo considera e motibo cu Haitianonan no a busca desaroyo.  Esaki ta un berdad of excuus di hasta lidernan sindical?

Awe sanger ta wordo drama atrobe na Haiti, cu gruponan di asistencia mundial ta bandona. E Presidente actual ta wordo acusa di no a uza placa di pueblo pa pueblo.

Mundo ta sigui e desaroyonan na Haiti. Tin temor cu comunismo ta trata na infiltra.

Na varios ocasion, eleccion a pone iskierdista na poder. Nan a faya y a baha nan na tempo.

E Haitiano ta busca un futuro pa e pais, cu e grupo creciente di catibo Africano a kita for di Francia.  Awe catibo di miseria, hamber y dolor mas y mas Haitiano mester busca porvenir pafo di nan pais.

 


Sigui habri wowo di comunidad pa problema di bista
Source:  Diario Online
donderdag 17 oktober 2019 01:35

Resumen

Problema di bista ta uno di e condicionnan cu mas ta afecta calidad di bida di ciudadanonan.

E ta cuminsa cu e mucha na school cu por bira victima di educadornan cu no ta realisa cu e mucha no ta capaz na lesa bon of mira obhetonan necesario. Tin caso di mucha cu problema serio pa splica cu nan no por skirbi of lesa bon of hasta practica deporte pasobra nan bista no ta permiti.

Den trabou diario di e adulto, problema di bista por lanta baricada pa exito y progreso. Tin trabou cu un persona cu no tin bista perfecto, no por haci.

Problema di bista ta stroba un relacion normal entre hende den demasiado caso.  Hopi hende no kier laga otro ripara cu nan bista no ta bon ya cu e ta afecta nan relacionnan.

Den mundo di deporte nan tin problema pa participa. Tin condicionnan cu ta stroba hende di mira obhetonan transparente.

Tin hopi motibo cu hende por perde nan bista. E por ta accidente of enfermedad cu ta haci hende incapaz pa haci uzo di e facultad pa mira peliger, mira expresionnan di otronan, mira su ambiente, mira cambionan, mira hasta con hende ta cambia fisicamente mientras edad ta aumenta.

Perdida di bista ta un proceso sumamente doloroso ya cu e ta afecta calidad di bida drasticamente. Descubrimentonan a haci posibel pa hende por haci, pero e hende ta keda depende di otro pa hopi asunto basico.

Atende cu un persona cu problema di bista, ta algo cu mester splica comunidad. Mester bini programanan intenso pa haci hende comprende ki ora e ta enfrenta un persona cu un problema visual.

Un persona mester firma un documento. E no por mira bon unda e mester pone su firma.

Baha un trapi por ta sumamente peligroso. E accionnan cu ta parce mas facil, ta sumamente dificil pa un persona, cu ta perde su bista y ta cuminsa mira sombra loke na principio ainda ta permiti haci manera por mira loke ta enfrenta.

Perde bista ta mescos cu keda atrapa den un camber caminda coriente a bay. Un persona no por reconoce unda e ta. E no por mira kico ta pasa rond di su persona.

Den un comunidad cu continuamente ta pega na un telefon pa manda mensahe pa otro, no tin contacto cu tanto personanan cu entre otro falta di vision mester.

Un persona sin bista mester di zonido, e mester di hende cu ta haci contacto. Comunidad moderno, cu ta isola hende, ta dificil pa un hende cu problema di bista enfrenta.

Na mes momento e chens cu bista di hende ta wordo afecta, ta bira mas grandi. Uzo di computer ta un problema. Chens pa accidente ta otro.

Calidad di bida ta un topico importante di e hende moderno exigente. Pa un persona cu problema di bista, calidad di bida ta depende di loke ta reemplasa bista cu na prome luga ta comprension y sentimento humano.

E miho invento pa atende cu perdida di bista, ta hende cu ta bira invisibel pero tambe indispensabel pa esun cu ta perde su bista.

 


Eman y Dowers mester splica redashi contra Rocco Tjon
Source:  Diario Online
donderdag 17 oktober 2019 01:33

Mester investiga Veiligheidsdienst si Melvin Tromp no a gaña

* Melvin Tromp mester retira di Parlamento si el a manipula 

ORANJESTAD(AAN)–Un caso sumamente serio a desaroya siman pasa ora Melvin Tromp di AVP a lansa acusacion pisa contra Rocco Tjon y a tira nomber di Tjon den lodo. Segun informantenan Melvin Tromp mester pone prueba riba mesa. E prueba cu tin awor ta, cu tin un gañado den e asunto cu mester haya claridad y no por muri sin mas.

Siman pasa mundo politico di Aruba a bira scenario di un acto sumamente serio.  E  lider di partido AVP,  Mike Eman cu no kier drenta Parlamento, a lansa atake frontal riba Ministerio Publico pa motibo di e investigacion contra Benny Sevinger.

Despues di e incidente aki, Melvin Tromp a abusa di su papel di representante di pueblo pa a lansa un informacion sumamente pisa contra Rocco Tjon.

E acusacion di Melvin Tromp no tabata basa riba un asunto relaciona cu trabou di Tjon como miembro di Parlamento.

Melvin Tromp a cuestiona integridad di Tjon y a crea e impresion cu tabata tin un caso penal den cual Tjon a wordo condena pa algo sumamente serio.

Melvin Tromp a haci pueblo kere, sin prueba, cu ta pa motibo personal y pa vengansa, Tjon a pidi investigacion den caso di terenonan di gobierno di cual Benny Sevinger ta wordo acusa.

Despues di e acusacion di Melvin Tromp, Rocco Tjon a entrega na prensa prueba cu Veiligheidsdienst di Aruba ta confirma su integridad. Tambe Tjon a mustra cu Mike Eman como Ministro Presidente y Arthur Dowers como Ministro di Husticia, a nombra su persona como Director na KIA.

For di e momento no a tende nada mas di Melvin Tromp ni di AVP  pa splica pueblo kico a pasa y kende ta papia berdad den e loke awor mester yama redashi lansa pa Melvin Tromp.

Informantenan ta papia di un caso serio y ta bisa cu ley ta exigi Arthur Dowers y Mike Eman pa acepta nan responsabilidad y bin splica Aruba si ta berdad cu nan na 2016 a nombra Rocco Tjon como Director di KIA y cu nan tabata tin sosten di Veiligheidsdienst di Aruba.

“Mester exigi Arthur Dowers y Mike Eman pa bin bisa pueblo di Aruba si loke Melvin Tromp a bisa ta mentira of berdad,” a wordo bisa.

E caso aki no por bira un”hit and run” caminda ta susha nomber di hende sin prueba legal pero mas bien cu prueba na fabor di Rocco Tjon, a wordo mustra.

Melvin Tromp a haya oportunidad pa haci su acusacionnan a base di e hecho cu e ta representante di pueblo. Na Aruba haci redashi, sigur como miembro di Parlamento pa acusa otro, no ta wordo considera obra di cabayero.

Melvin Tromp mester bin bisa Aruba si e tabata of no tabata na haltura cu Eman y Dowers a nombra Tjon na KIA y a sostene nan nombramento riba e documento di Veiligheidsdienst cu na 2014 tambe a bisa cu Tjon a pasa screening.

“Si Melvin Tromp no a gaña,  Eman y Dowers a nombra Tjon contra regla y Veiligheidsdienst no a haci su trabou loke ta exigi un investigacion legal,” informantenan a splica.


Parlamentario Sneek ta opina cu un wega politico Minister di Infrastructura tin
Source:  Diario Online
donderdag 17 oktober 2019 01:33

Tocante ley di Serlimar sin incinerator:

ORANJESTAD (AAN) – Parlamentario Marlon Sneek di fraccion di AVP, ta mira e asunto di e ley di Serlimar y e amiendanan di cambio manera e incinerator  cu a keda afo di e ley, como un wega politico di minister di infrastructura y medio ambiente.

Segun Sneek via APV e minister por identifica e lugarnan cu ta bira “stort plaats� (deposito pa tira sushi). Segun e parlamentario, e minister a bisa cu ta bay kita e
“grote brand ovens� y cu esey no tin nada di haci cu incinerator. No obstante, tin un destaho publico ta tumando lugar pa un incinerator.

E parlamentario ta haya cu esaki ta gewoon un wega politico di e minister cu ta bisa cu ta nada ta bay pasa, pero no ta berdad pasobra e destaho publico ta riba su lesenaar y e ta discutiendo cu e partnernan cual ta e mihor formula cu nan por traha, y cuanto nan ta bay cobra ora nan ta trece sushi nan, pa cada ton y cuanto pa coriente, y pa nan mes bin cu un formula.

E parlamentario a subraya si tog sake for di e ley e no ta haci nada, pasobra tin un destaho publico tumando lugar pa e incinerator y si gobierno ta bay cumpra e oferta, ta Serlimar ta bay pague.

El a expresa cu e minister ta djis purba di acomoda hende pa e haya su 12 voto pro e ley, menos di fraccion di AVP cu ta wak cu e ley ta uno discriminatorio.

E parlamentario a subraya cu gobierno ta esun cu ta dicidi kico ta bay pasa of no, pasobra na final di dia gobierno ta responsible. Pero na momento cu tin un compania caba cu ta dunando e servicio, tin cu tene cuenta cu e componente ey.

Parlamentario Sneek a bisa cu manera por mira den e oferta, nan ta papia di 90 mil ton di sushi cu ta bay Parkietenbos di cual por saca kizas, 20 ton di material medico, taira, etc., y 70 ton ta bay den e machine. Segun Sneek e minister lo no por cumpli cu locual e ta bisando den su RFA.

Tocante e punto di gobierno cu Serlimar ta esun cu ta mantene Aruba limpi, cu ta piki bestia morto for di caminda, entre otro cu e compania priva no ta haci, e Parlamentario a subraya cu no mester lubida cu gobierno tin un acuerdo di servicio cu e compania nacional Serlimar.

Nan a firma un contrato y Serlimar ta haya 22 miyon florin for di pais Aruba. Uno pa recoge sushi domestico y dos, pa haci e trabaonan adicional manera tene barionan limpi y piki bestia morto. Sneek a acentua cu no ta un regalo cu Serlimar ta haci di bon curazon pero nan tin cu hacie pasobra nan ta wordo paga pe, for di tur gobierno cu a sinta y pa añanan caba.

El a señala cu e no kiermen cu Serlimar no ta haci un bon trabao. Pero a reitera cu nan ta wordo paga pe pasobra tur gobierno sa cu mester tene Aruba limpi y cu no por laga bestia morto riba caminda.

E ta di acuerdo si cu e compania priva mester duna algo extra na e comunidad, como un bon ciudadano. Cada compania ta colabora na e forma con nan kier hacie, sea riba tereno social of otro, y e ta spera cu tur empresa haci esaki tambe pasobra esaki ta yuda den e totalidad.

Parlamentario Sneek a subraya cu ni e ley ni e incinerator toch ta e solucion, pasobra Parkietenbos no ta bay cera. El a reitera cu den e ley mes segun datonan di e minister mes, tin un average di 90 mil ton di di sushi di cual 20% ta medical waste y otro tipo di desperdicio y 70% ta voluble.  E problema di sushi y di e dump, Sneek ta considere un problema nacional cu henter comunidad tin cu sinta busca un solucion, no bringando otro. El a referi na un bunita video cu nan a pasa na Tele Aruba, pero cu no ta duna e solucion pa e problema, pero simplemente e mandatario kier bende su producto pa haya su 12 voto pa aproba e ley, pero pais Aruba no ta beneficia di dje.

 


Berguensa nacional ta pa permiti un ex minister di AVP vota y tuma decision riba cualkier ley
Source:  Diario Online
donderdag 17 oktober 2019 01:31

Parlamentario Endy Croes: Benny mester retira 

ORANJESTAD  (AAN): Parlamentario Endy Croes a declara cu den parlamento ta reinando un sentimento no corecto unda masha hopi ta e coleganan cu ta puntra cada rato si ta normal cu Benny Sevinger por participa den reunionnan publico y vota riba leynan.

E pregunta aki a bin di algun miembro di su mesun Fraccion tambe. Durante cu a trata e ley di Serlimar diamars ultimo por a tuma nota cu Benny Sevinger – e sospechoso principal den e caso di corupcion andando conoci bou di e nomber di AVESTRUZ – a cana kibra basta laat den Parlamento y a acudi na e presidente di parlamento firmando su nomber riba e presentielijst.

Notabel ta si cu Benny ta cana rond manera nad’un pasa y momento el a caba di firma e no a bay sinta na su stoel pero a bandona e sala y no a regresa mas. Pues Benny ta solamente en espera di e orario pa vota pa e por regresa bek den sala.

Unda decencia a keda?

Parlamentario Endy Croes ta indigna como cu Parlamento no por funciona di e forma aki. Con ta posibel cu un homber, esta  ex minister di AVP sospechoso  pa 5 cargo por wordo permiti pa sigui cobra y ta vota riba leynan den parlamento? Unda decencia a keda? Unda honor y dignidad a keda? Unda respet a keda? Esaki ta algo no comun y lo sigui busca den ley algo cu por prohibi esaki y asina saca Benny pafor di parlamento.

Endy Croes a pidi su colega Vrolijk pa acelera un ley cu e ta bezig cune pa asina pronto por pone Benny porta afor.  Tur cos ta mustra cu Benny a coopera den bendemento di patrimonio di pueblo unda e “mafia gang� tabata opera den su kantoor cu un di e miembronan di e banda criminal aki esta un doño di radio na Playa  ta manda instruccion mediante email kico mester wordo haci y cu manera cu tal carta sali e promer 100 mil florin ta cla (“E check ta cla?).  Tin prueba unda 1 solo tereno a wordo bendi contra ley pa 3.5 miyon dollar. Ministerio Publico tin tur e email y documentonan aki.

Benny, entrega bo retiro

Berguensa nacional ta pa permiti un ex minister di AVP vota y tuma decision riba cualkier ley. Ya cu Benny no a comporta su mes manera un cabayero teniendo honor na su mes y entrega su retiro te na momento cu e investigacion termina ta pone nos como representante di pueblo sigui busca solucion pa saca Benny for di cas di pueblo.

No lo straña nos kisas promer cu nos keda cla cu un ley pa reenforsa esaki Ministerio Publico mes ta actua y detene tur esnan cu  a enrikece nan mes bendiendo patrimonio di pueblo na un manera ilegal. Of bo mes ta bay of NAN ta bin busca bo!

Tristo pero tur documento riba mesa ta mustra un acto di corupcion y fraude “high class� hamas bisto na Aruba. Un caso mucho mas grandi cu caso IBIS di Paul Croes kende a wordo condena na 4 aña di prison.  Duna tempo tempo pa e caso aki sigui desaroya su mes.

Parlamentario Endy Croes ta haci un apelacion na Benny pa e duna balor y respet  na e organo Parlamento y asina entrega bo retiro.


Hyatt Place Aruba Airport ta orguyoso di conta riba un team di staff permanente y management 100% local
Source:  Diario Online
donderdag 17 oktober 2019 01:30

Marta Raven:

*Diaranzon a corta cinta

ORANJESTAD(AAN): Diaranzon mainta a tuma lugar cortamento di sinta na Hyatt Place Aruba Airport, pa apertura oficial di e hotel banda di aeropuerto.

Maestro di ceremonia Julisa Arends- Hoevertsz  despues di duna tur hende un bon bini, a bisa cu Diaranzon a duna  inicio na un concepto nobo di haci negoshi aki na Aruba cu inauguracion di Hyatt Place Aruba Airport.

“Aruba su hotel mas nobo lo brinda cada un di su huespednan un experiencia cu estilo moderno, comodo, cu un hospitalidad casual y un servicio atento y personaliza�, segun e maestro di ceremonia.

General Manager Marta Raven tambe a hiba palabra Diaranzon mainta.

El a bisa cu esaki ta Aruba su prome hotel den e concepto di Hyatt Place.

“Hyatt Place Aruba Airport ta specialmente diseña pa e viahero ehecutivo cu ta bishita nos islanan pa haci negoshi y ta busca un experiencia hotelero den un estilo contemporaneo, comodo y cu ta adapta na su estilo di bida y rutina�.

“Nos concepto di Hyatt Place lo ofrece e viahero aki tur e facilidadnan, cu un servicio atento y personaliza y sigur lo brinde tambe un camber comodo y silencioso, danki na nos diseño ultra moderno y sofistica pa e por descansa despues di su dia largo di trabao�.

Esaki segun Raven, kende a sigui bisa cu e proyecto Hyatt Place Aruba Airport a inaugura na un momento ideal, unda cu casi por bisa cu e ta bay man den man cu e proyecto di expansion di aeropuerto.

“E expansion di nos aeropuerto lo trece un fluho mas grandi di turista pa nos isla y lo expande Aruba su potencial como hub den e region�.

“Nos di Hyatt Place ta e concepto perfecto pa ofrece acomodacion na e viahero aki�, segun e General Manager, kende a indica cu e hotel ta consisti di 116 camber den diferente tamaño, cu un diseño contemporaneo y espacioso�.

“Cada camber tin un bentana cu un bista fabuloso di nos isla, haciendo esaki manera un cuadro bibo cu lo garantiza un experiencia unico pa nos huesped�, segun Raven, kende a sigui bisa cu cada camber ta diseña pa brinda confort maximo di e bishitante.

E GM a splica tambe cu na di dos piso di e hotel tin un ‘Welcome Area’ y un Ballroom caminda lo tene eventonan social y reunionnan.

Tambe tin un sala di reunion cu por wordo dividi den tres diferente espacio mas chikito.

“Nos salanan di reunion ta bon equipa cu e tecnologia mas moderno den e region, pa asina eleva e experiencia di nos clientela y huesped�, segun e gerente general di e hotel.

El a sigui bisa cu e hotel ta orguyoso di conta riba un team di staff permanente y management cu ta consisti 100%  di empleadonan local, cu ta wordo asisti, asesora y ta haya training di e representantenan corporativo di Hyatt International.


Problema den e sistema UPS a rekeri di evacuacion na Aeropuerto Reina Beatrix
Source:  Diario Online
donderdag 17 oktober 2019 01:26

Como un ora despues situacion a normaliza:

ORANJESTAD (AAN) — E Relacionista Publico di Aeropuerto Reina Beatrix, Hendrik Croes, a duna prensa informacion Diaranzon mainta, tocante e motibo pa cual tabata tin evacuacion den e instalacionnan di Aeropuerto.

Hendrik Croes a splica cu for di mainta tempran nan a ripara cu tabata tin un problema den e sistema di ‘Charlie Charlie’, cu ta e departamento di comunicacion, unda tur e camaranan cu tin den aeropuerto ta wordo maneha.

Ora cu e profesionalnan concerni a bay investiga a bin constata un problema den e sistema UPS (Uninterruptible Power Supply) cu tin den e aeropuerto, cu a ocasiona un explosion y a cuminza gasnan, posiblemente toxico.

Como consecuencia di esaki AAA tuma contacto mesora cu Departamento di Bombero, a cera e area unda e oficina aki ta situa, pa e gasnan no por sali.

Croes a relata cu e aspecto fastioso ta cu e ora ey e gasnan ta bay na e sistema di cooling cu tin na aeropuerto, anto como medida di precaucion di brandweer, mester a evacua tur persona cu tabata na aeropuerto e momento ey, den e area di yegada.

“Esaki no a conta pa e pasaheronan cu tabata den e sala di espera. E situacion no tabata tin influencia riba nan�, sr. Croes a splica.

No obstante si a trece efecto den e area di salida di e parti bieu full ariba biniendo abao, e PR a menciona. E no a conta solamente pa e pasaheronan sino pa tur esnan cu ta traha den e area ey.

Na e momentonan ey tabata tin un vuelo (DIVI) cu lo a caba di yega pero e pasaheronan no por a baha for di e avion, te ora Brandweer lo a duna OK.

E siguiente avion cu mester a baha na Aruba tabata JetBlue pa 10.30 am, cu speranza cu e situacion lo por a wordo soluciona prome cu e avion baha. En todo caso, si no lo a logra e pasaheronan lo no por a baha for di avion.

Ambulance tabata tey pa duna e asistencia necesario y aeropuerto mes tin su mes ekipo pa por yuda esnan cu por a sinti efecto di e situacion.

Esaki ta prome biaha cu aeropuerto a experiencia e tipo di situacion aki, Hendrik Croes a bisa, contestando un pregunta di prensa.

Despues di un ora di e sucedido e situacion a normaliza na aeropuerto, tanto pa e trahadornan como pa e pasaheronan cu a yega Aruba. Informacion cu DIARIO a haya ta indica tambe cu ta e board di e computer a kima, pero afortunadamente no tabata e bateria, cu si lo por a causa un situacion mas serio y fastioso.

 


Programa Multidisciplinario “Rescate di Memoria pasobra Abo tambe conta� na BNA
Source:  Diario Online
donderdag 17 oktober 2019 01:24

Awe nochi na honor di cuater talento destaca di Aruba:

ORANJESTAD (AAN) — Awe, Diahuebs 17 di October 2019, lo ta e gran anochi den cual cuater persona hopi destaca den nos comunidad lo wordo reconoci y honra na Biblioteca Nacional Oranjestad.

Manera e gestor cultural y linguista sr. Mirto Lacle a informa, recientemente, den conferencia di prensa pa anuncia e evento aki, ta trata di sres. Taly Wever, Joe Dania, Johnny Scharbaai y Ronny Kock.

Un evento cu ta carga e nomber di “Rescate di memoria pasobra abo tambe ta conta� den cual lo compila rasgonan importante di e bida di e cuatro talentonan Arubiano, menciona. Biblioteca Nacional y Departamento di Cultura Aruba ta uni den colaboracion cu e gestor cultural y Linguista sr. Mirto Lacle, pa deleita e publico presente y e personanan cu lo wordo honra cu un programa multidisciplinario, unda  literatura, arte, cultura, linguistica y educacion en general lo tene man cu otro.

Manera a bin dilanti den e conferencia di prensa reciente, y reitera door di BNA via un relato di prensa, e programa ta consisti di:

Un documental produci pa George Jacobs y Mirto Lacle titula “Na caminda pa un centenario y celebracion centenario di Jose (Joe) Dania�.

Taly Wever ta un musico, artista, cantante: un embahador, trovado cu a aporta cu su talento tanto na Aruba como den exterior, den Caribe, Sudamerica te na Italia.

Ronny Kock “El ruiseñor di Savaneta�: ta un musico, artista, cantante, compositor, fundador di steelband “Jumping Jewels� y coach di diferente grupo di steelband na Aruba. Roony a cultiva diferente genero di musica, pianista virtuoso, cu a sali for di e cuna di famia Camacho di Savaneta.

Johnny Scharbaay, icono musical Arubano cu a dedica un bida na studia y investiga musica y a actua como musico pianista tanto local como internacionalmente pa huespednan distingui y di Cas Real, y cu bandanan di taya universal.

Frank Williams, maestro, docente di idioma den enseñanza secundario, educador, actor di teatro y poeta. Williams a contribui cu enseñanza di Aruba, no solamente dilanti di klas, pero como inspector di enseñanza, observador y dirigente. El a destaca como artista di teatro y a skirbi algun obra di teatro. El a compila poema, a traduci na Ingles y a skirbi: “Historia di Poesia, Isla di Mi�, cu ayudo di Wim Rutgers.

Un anochi sigur cu ta priminti di ta sumamente interesante, educativo, ameno y cu ta duna tur presente e privilegio di acerca e cuater talentonan Arubiano, grandi aki. Pues cu tur razon BNA y Mirto Lacle, ta bolbe extende un invitacion na pueblo di Aruba pa no perde e anochi aki, di 7 or pa 10 or na Biblioteca Nacional Aruba, Oranjestad. “Rescate di Memoria pasobra abo tambe ta conta�!


‘Expertise France’ encarga cu ehecuta e proyecto regional di e di 11 EDF di bishita na Aruba
Source:  Diario Online
donderdag 17 oktober 2019 00:24

Nan ta pone 40 miyon Euro disponible pa 12 pais OCT di Caribe

ORANJESTAD (AAN):  Un aña pasa, 25 di October 2018, durante Caribbean OCT’s Resilience Summit na Sint Maarten, Prome Minister Evelyn Wever-Croes hunto cu 11 otro representante di Islanan di Caribe, a firma un convenio cu Union Europeo cu ta pone 40 miyon Euro disponible pa 12 pais OCT (Overseas Countries and Territories) di Caribe por uza e fondo aki pa traha riba 3 area.

E siman aki, e management team, ‘Expertise France’, cu ta encarga cu ehecuta e proyecto regional di e di 11 EDF, (European Development Fund), a cuminsa cu bishitanan na Aruba y nan a cuminsa cerca Prome Minister. Durante e dianan aki teamnan local lo presenta proyectonan riba e tres area aki.

E prome area: Energia y eficiencia den uzo di energia

Aki kier enfoca mas riba e eficiencia, pues con pa gasta menos energia, locual ta pas den e vision di Gabinete Wever-Croes. Gobierno di Aruba no ta enfoca riba visionnan cu no ta realistico manera tawata tin den pasado. Nos ta recalibrando e vision cu e meta pa yega na e punto cu Aruba por ta completamente independiente di crudo, y bay over na un combinacion di gas y diferente fuente di energia alternativo. Y mientras tanto, Aruba lo enfoca riba eficiencia. Nos enfasis ta bay mas pa enfoca riba haci energia mas barata y baha e gastonan na Aruba.

E di dos area: Conservacion di nos area marino

Esaki ta encera e atencion duna na nos bida marino, cu ta sumamente importante pa Aruba mirando cu turismo ta nos unico pilar economico. Hopi di nos turistanan ta bin Aruba door di nos area di beach sumamente bunita y tambe door cu nos tin un area marino. Nos mester proteha e area aki pa cua tin fondo den e 40 miyon Euro.

E di tres area: Miho preparacion pa calamidad

Con ta preveni disaster y con pa prepara miho pa disaster ta un tema di importancia y hopi actual tambe na Aruba. Bou di e tema aki, Aruba lo atende cu e efecto cu e crisis migratorio Venezolano tin riba nos pais, mirando cu nos ta considera esaki un calamidad na Venezuela cu tin un impacto grandi na Aruba.

“Mi ta hopi contento y satisfecho cu Aruba por tin e fondo aki disponibel pa cubri diferente maneho di Gobierno den e 3 areanan menciona. Den e temponan aki financieramente dificil, tur ayudo cu nos por haya ta bon bini�, Prome Minister Evelyn Wever-Croes a expresa.

 


Stichting Parkietenbos y Serlimar a topa na Ser’i Teishi
Source:  Diario Online
donderdag 17 oktober 2019 00:22

ORANJESTAD (AAN):  Un team di boluntario cu ta forma parti di Stichting Parkietenbos a topa cu Serlimar na Ser’i Teishi ayera mainta pa 9:30.

Esaki tabata un reunion solicita ya pa algun siman caba di parti di e fundacion di e barionan pa motibo cu ademas di huma y holor malo di e dump di Parkietenbos, holor malo di Ser’i Teishi tambe a cuminsa afecta e barionan concerni.

E team di habitantenan tabata di e barionan: Mahuma,  Parkietenbos, Simeon Antonio, Buena Vista y Bucutiweg. Nan a reclama energicamente na Serlimar e holor malo cu ta biniendo di e area di Ser’i Teishi y kier a haya un splicacion pasobra cu e solucion temporal aki ta birando un di dos molester y peliger pa salud di e famianan di e barionan den cercania.

Director di Serlimar Sr. Henly Davelaar y demas personal di Serlimar presente a duna un splicacion amplio di e situacion na e habitantenan di e barionan di kiko ta nan plan y strategia di trabao pa remedia e situacion.

Nan a informa cu den algun dia nan lo haya extra material di Inglatera pa pone riba e area caminda cu holor ta saliendo. E miembronan a recorda e director di Serlimar di cuanto molester ya nan ta hayando di e Dump na Parkietenbos. Tur aña for di lunanan di juli-augustus ora cu biento cuminsa cambia di direccion te cu luna di november nan tin cu soporta e molester di gas y huma toxico di e dump. Pues nan ta spera cu Ser’i Teishi rapidamente por ser controla pa e no bira un di dos molester ambiental continuo y menasa pa salud di e famianan di e barionan concerni.

Director di Serlimar a informa e habitantenan cu e problema di desperdicio ta uno compleho y grandi y cu e situacion ta hopi critico pasobra tin falta di espacio, tempo, recursonan financiero y ley na e momentonan aki pa resolve den forma duradero e problema di desperdicio.

El a enfatisa cu e problema di e dump di Parkietenbos ta un problema pa Aruba completo awor aki y cu e mester wordo sera. Stichting Parkietenbos ta spera cu miembronan di Parlamento y Gobierno comprende y carga nan responsabilidad, e situacion di e miles di habitantenan di e barionan ta un asunto critico y urgente.

E huma toxico di dump cu cada bes ta drenta e barionan concerni ta causa cu varios habitante ta sufri di ‘Chronic Obstructive Pulmonary Disease’ (COPD) manera entre otro astma. No por warda mas tempo pa drecha e situacion actual, mester remedia e situación AWOR MES!

 


<< < Vorige 1 2 3 4 5 6 7 8 9 10 Volgende > >>