VicksWeb upgrade Location upload ads trending
VicksWeb Aruba

Welkom bij VicksWeb™

Flag Counter

© 2016 VicksWeb Inc.

Over | Privacy | Hulp | Voorwaarden | Feedback | Beveiliging | Diensten

Recompensa di 10.000 pa asesinato di dama di 81 aña di edad na Corsou
Source:  NoticiaCla
dinsdag 15 oktober 2019 10:02

WILLEMSTAD - Relaciona cu e atraco cu morto, cu a tuma luga den marduga di 26 di september ultimo den Kanga, caminda e señora Agnes Maria Damoen di 81 aña di edad a perde su bida, Polis hunto cu Ministerio Publico ta realisando investigacion den e caso aki.Ta trata di e caso di atraco, unda cu den e oranan trempan di mainta riba e dia encuestion, un yiu lo mester a yega cas di su mama y a tuma nota cu e mama tabata benta abou den cas cu sanger na nanishi y no tabata duna señal di bida. Durante un investigacion preliminar cu polis a haci na e sitio, nan a constata cu un bentana di camber tabata forsa y tur cos den e camber tabata di bolter. Pa logra pone man mas lihe cu ta posibel riba e malechornan, ta haci un suplica na comunidad pa coopera cu e suministracion di informacion den e caso aki. Ministerio Publico hunto cu famia di e victima a pone un recompensa di 10 mil florin disponibel, na e informacion cu por conduci na solucion di e caso aki. Pa duna tip riba e caso aki, por yama e number anonimo di polis 108. Cuerpo Policial y Ministerio Publico ta conta riba yudansa di comunidad, pa por soluciona e caso aki tambe. Cortesia Extra.    

Warda costa a intercepta remolcador cu 2.200 kilo di cocaina
Source:  NoticiaCla
maandag 14 oktober 2019 20:36

ORANJESTAD.- Warda costa a intercepta un remolcador cu 2.200 kilo di cocaina abordo dialuna marduga. Asina e vocero di Warda Costa Shalick Clement a confirma dialuna atardi pa Noticiacla.com. E remolcador 'Gracia' bou bandera di Samoa, tabatin 5 persona Venezolano abordo, a wordo acompaña pa waf na Playa pa mas investigacion. Cooperacion entre Warda Costa, Arumil, douane, polis K9, dept crimen organiza tur a yuda cu a logra gara e cantidad di droga aki. Despues a hiba e remolcador pa Marinierskazerne na Savaneta pa mas investigacion. Tur cinco persona a keda deteni y entrega na KPA. 

Parlamento ta continua cu reunion riba ley di Serlimar diamars mainta
Source:  NoticiaCla
maandag 14 oktober 2019 18:20

ORANJESTAD – Parlamento ta continua cu e reunion publico pa trata e ley di Serlimar diamars mainta 9’or. Manera ta conoci e tratamento di e ley a cuminsa dia 2 di October, pero anochi laat a dicidi cu ta pospone esaki te despues di hersft vacantie, y a pone e fecha di diamars mainta 9’or. Na final di e reunion, parlamentarionan mester vota sea pro of contra e ley aki. Un aprobacion di e ley, por nifica problema pa dos compania di MetaCorp segun e compania mes a avisa. E compania ta alega cu e ley lo crea un situacion monopolistico y un competencia inhusto pa cual e sobrevivencia di e companianan EcoTech y EcoGas lo ta na peliger. E compania ta papia di entre 80 pa 100 tata y mama di famia cu lo por perde nan trabou.   

Diaranson Gobierno ta splica Parlamento pakico no a ratifica ley di cambio di LAFt
Source:  NoticiaCla
maandag 14 oktober 2019 18:11

ORANJESTAD – Diaranson mainta Parlamento ta tende gobierno di Aruba pa loke ta e motibo pa kico a dicidi di no ratifica e ley di cambio di LAFt. Manera ta conoci dia 6 di juni ultimo Parlamento a aproba e ley cu a contene e cambionan den e ley di LAft cu a ‘elimina’ e poder di Hulanda y duna Parlamento e control pa dicidi riba asuntonan di CAFt. Gobierno sinembargo a opta pa no ratifica e ley aki, y a informa Parlamento di esaki formalmente. Awor gobierno ‘formalmente’ mester splica Parlamento e pakico di e decision aki. No ta conoci kico e consecuencia di e reunion aki por ta, ya cu no ta usual cu esaki (esta cu gobierno no ta ratifica un ley pasa) ta pasa, pero no ta abnormal. Segun prome minister Wever, e ta e derecho pleno di parlamento pa a haci e cambio. Solamente cu gobierno no a haya e momento oportuno. Y mirando e reaccion di Hulanda y e consecuencia cu esaki por tin pa Aruba, a opta pa no ratifica esaki. 

Rotaract Club of Aruba a colabora cu diferente scol di Aruba cu The Graduation Project
Source:  NoticiaCla
maandag 14 oktober 2019 18:02

ORANJESTAD - E aña escolar aki ‘The Graduation Project’ lo ta celebrando su di 5 edicion. Esaki ta un proyecto unda miembro y boluntarionan di Rotaract Club of Aruba ta organisa diferente sesionnan durante aña escolar pa examenkandidaten. Meta di e proyecto aki ta pa stimula, motiva y sostene e studiantenan door di duna nan tips valioso. Abraham de Veer, St. Augustinus College, Maria college MAVO, Colegio Arubano, Ceque College y Avond MAVO, ta e scolnan cu miembronan di Rotaract Club of Aruba lo ta bishitando pa duna diferente workshops durante e aña escolar.  E tema di e proyecto pa cu e aña escolar aki ta ‘Identify, Connect & Achieve’, caminda studiantenan lo identifica unda nan ta premira cu nan lo enfrenta problema/dificultad durante nan examenjaar. Alabes, e sesionnan lo yuda e studiantenan conecta mihor cu nan mesun metanan pero tambe mayor y docentenan. Asina aki ta percura cu e studiante tin e sosten necesario cu sigur ta uno sumamente importante durante examenjaar.  Pa inicia ‘The Graduation Project’, lidernan di e proyecto Bjorn Vrolijk y Rebecca Maduro hunto cu miembronan a haci bishita na Abraham de Veer school y tambe St. Augustinus College pa asina sera conoci cu e alumnonan. Alabes duna un mini workshop unda nan a papia tocante e difficultad cu studiantenan por encontra, expectativanan pa cu e aña escolar y tambe a intercambia experencia cu otro. Mester añadi cu esaki ta e parti cu ta haci e proyecto uno bunita, unda cu un grupo di hoben cu diferente experencia ta bini hunto y intercambia esaki pa asina mustra e examenkandidaten cu nan no ta nan so.  Net prome cu SO-periode cuminsa, Rotaract Club of Aruba lo ta organisando dos anochi caminda mayor y studiantenan di Abraham de Veer School y St. Augustinus College MAVO ta cordialmente invita dia 15 y 16 di oktober na Teresita Center di 7or pa 8:30 di anochi, unda nos lo tin diferente invitadonan special presente cu lo elabora mas riba e importancia di sosten emocional y comunicacion durante examenjaar. 

Trahado di Hof na Corsou manda cas den investigacion di iregularidadnan na griffie
Source:  NoticiaCla
maandag 14 oktober 2019 17:56

WILLEMSTAD – Durante e control annual di entrada y deposito di placa di griffie, e directive di Hof (Corte) a nota iregularidadnan. E asina yama Griffie rechten ta e gastonan cu esnan cu ta cuminsa un caso, mester paga na corte pa cuminsa un proceso legal. A base di e iregularidadnan constata, a inicia un investigacion. Den cuadro di esaki a manda un trahado di Hof cas. No tin detayes manera cuanto placa a disparse y e investigacion ta andando ainda y corte lo no duna mas informacion riba e caso aki. Asina corte a informa den un comunicado.   

Dos auto a accidenta na crusada Caya Musica
Source:  NoticiaCla
maandag 14 oktober 2019 17:51

ORANJESTAD - Na e crusada di Caya Musica y Danza dialuna atardi a sosode un accidente entre dos auto pa falta di preferencia. Tanto e chauffeur den e van y e SUV a keda levemente herida y a keda atendi pa personal di ambulance. Polis di trafico y roadservice tabata na e sitio pa atende cu e accidente.

Prome Minister a firma e MoU cu CITGO dialuna mainta
Source:  NoticiaCla
maandag 14 oktober 2019 17:29

ORANJESTAD – Un siman despues cu gobierno a anuncia cu hopi fanfaria, cu a yega na un deal cu CITGO y cu tin un MoU, esaki a keda firma dialuna (awe) mainta entre prome minister di Aruba Evelyn Wever y e director interino di Refineria di Aruba (RdA) Renny Arends. E MoU a wordo firma prome pa CITGO na Merca y awor a yega Aruba pa esaki wordo firma aki tambe. Prome Minister a enfatisa cu e MoU aki un etapa nobo ta cuminsa pa Aruba.  OTRO FASE “Nos no a caba di negocia e suspencion / terminacion ainda, pero cu e MoU mientras cu nos ta negocia e suspension / terminacion, Aruba por cuminsa busca otro operador y otro oportunidadnan nobo pa Aruba�, Prome Minister a duna di conoce. ACUERDO Manera a wordo anuncia siman pasa, gobierno di Aruba a anuncia cu nan a logra yega na un acuerdo cu e refineria pa Aruba por haya e yabi di e refineria y e terminal for di Citgo. Esaki ta pa permiti Gobierno di Aruba busca otronan cu ta interesa den opera e terminal y e waf, y e refineria tambe. Mes momento ta garantisa derecho di trahadonan di e compania. Apesar cu no ta empleadonan di Gobierno, Gobierno di Aruba a insisti pa e derechonan di e trahadonan wordo salvaguardia tur momento. REFINERIA Cu e firmamento di e MoU, Gobierno di Aruba por cuminsa negocia cu otro partidonan interesa. Ya caba tin un lista di mas di 25 compania cu a expresa nan interes den ultimo tempo, sinembargo Gobierno no por a negocia cu nan, pa haya sa si nan ta partnernan serio. Awor si esaki ta posibel. Gobierno lo no limita su mes na e lista di compania aki so. Gobierno lo bay busca activamente na mas inversionista, entre otro door di tene un road show na Houston, caminda tin inversionistanan serio, pa lanta nan interes pa inverti na Aruba. E comision encarga cu negosacion lo wordo formalisa dentro di poco. Riba peticion di sindicato, empleadonan tambe lo wordo envolvi den e proceso aki. Gobierno ta buscando un partner serio, cu tin e fondo pa inverti mesora den e refineria, pa hasi’e un refineria ‘state of the art’, cu ta cumpli cu standardnan medioambiental, cu ta paga su fair share na caha di Gobierno, y cu ta trata su empleadonan bon. TERMINAL Y WAF Cu e firmamento di e MoU, Gobierno ta haya control di e waf y di e tankinan. Tur hende ta corda e bon temponan di Wickland Oil, cu a opera e tankinan cu hopi ganashi. Citgo ultimo tempo a neglisha e tankinan. Y apesar cu nan falta hopi mantencion, nan tin un balor hopi halto. Segun gobierno di Aruba nan ta bay percura pa e negoshi aki bira uno hopi exitoso cu ta genera hopi entrada pa Gobierno, y cu lo crea hopi cupo di trabou. EMPLEADONAN E punto di salida di Gobierno ta cu tur empleado mester keda cu nan trabou, en todo caso mas tanto empleado posibel, bou di e operador nobo. Citgo a indica anteriormente cu tanten cu no ta sigur si empleadonan lo wordo tuma over pa e operador nobo, y Citgo mester paga nan cu tur nan aña di servicio, cu Citgo no tin placa pa esey. Sinembargo aki e forsa di negosacion di Gobierno a hunga un rol grandi, y a pone como condicion mas importante pa Citgo cu nan mester paga tur loke nan debe na trahadonan, contratistanan y otronan cu nan debe. Premier Evelyn Wever-Croes a indica cu e empleadonan ta importante pa Gobierno y nan interesnan mester bin na prome luga.           

Gobierno di Aruba a pidi Hulanda pospone tratamento di aanwijzing
Source:  NoticiaCla
maandag 14 oktober 2019 10:55

ORANJESTAD – Gobierno di Aruba a pidi gobierno di Hulanda pa pospone e tratamento di un posibel ‘aanwijzing’ pa e proximo reunion di conseho di minister di Reino (RMR) cu ta 22 di november 2019. Asina prome minister Evelyn Wever a bisa dialuna mainta durante conferencia di prensa semanal di gobierno. E punto di bista di gobierno di Aruba ta, cu Hulanda no por pone e punto aki di aanwijzing den menos cu tres siman riba agenda. Algo cu a sosode e biaha aki segun Wever. Ta keda awor na Hulanda si nan ta bay di acuerdo cu e peticion pa trata esaki den e proximo RMR. Segun Wever, pa un agendapunt, mester tin por lo menos 3 siman pa por haci esaki. Y e ta pensa cu awor esaki no a sosode. Si esey ta logra, esta pospone esaki, no ta conoci.  E CARTA Wever lo ta pensando cu e fecha lo ta conforme e carta cu el a ricibi siman pasa dialuna di secretario di estado di Hulanda Raymond Knops, esta 7 di October ultimo, ta e fecha riba cual Hulanda lo a ‘agendeer’ e punto di aanwijzing. Hecho ta, cu Knops a informa prensa for di e ultimo RMR cu tin un fecha di 18 di oktober riba cual por bin un posibel aanwijzing.  AANWIJZING Pa loke ta e cantidad di aanwijzing, Wever no por duna e confirmacion si ta un of dos aanwijzing Aruba lo por haya. E ta papia di menasa di dos aanwijzing, pero no por a confirma na e portal aki, si ta enberdad 1 of 2 aanwijzing. Loke ta e caso ta cu e colegio di supervision financiero CAFT a sugeri na RMR pa un aanwijzing. Esey ta uno sigur. E otro ta un si posiblemente Hulanda no acepta e sugerencia di cambio pa loke ta e ley di LAFT cu mester ancra e protocol di November 2018 den un ley. 

AHATA: Ocupacion di hotelnan na September ta menos cu Augustus
Source:  NoticiaCla
maandag 14 oktober 2019 10:38

ORANJESTAD  Aruba Hotel & Tourism Association (AHATA)  a raporta e siman aki cu ocupacion di hotelnan na September ta menos cu augustus. AHATA ta acumula e cifranan di ocupacion y prijs di hotelnan tur luna, y den cuadro di esaki, pa luna di September 2019 e CEO di AHATA Tisa LaSorte a anuncia cu resultado di September tabata mihor cu aña pasa pero menos cu Augustus.  Historicamente na Aruba e luna di September tin menos ocupacion y balor cu otro luna den aña, y na 2019 esey a sosode atrobe.  Na September ocupacion a baha cu 8 punto compara cu e luna anterior y balor di camber a baha cu 11%.  Compara cu September aña pasa e ocupacion di camber di hotel a subi cu 4.2 punto. Na September 2019 Aruba a experiencia un averahe di ocupacion di 78.3%. E balor averahe di cada camber (ADR) ta 4.2% mas cu September aña pasa, yegando $211.78.  E RevPAR, cu ta e entrada averahe pa tur camber disponibel, na September 2019 tabata $165.73 y esaki ta un aumento di 10.1% compara cu un aña pasa y un caida di 20% compara cu Augustus.    Si compara e resultado di prome 9 luna di 2019 cu e mesun temporada di 2018 ta nota cu ocupacion a subi un tiki cu 1.3 punto, pa un averahe di 85.7%. ADR a crese cu 6.8% y RevPAR a crece cu 8.4%. Aruba su turismo ta experienciando extra demanda pa cual motibo mayoria di hotel por cobra un tarifa mas halto, incluyendo den low season.  E cifranan di AHATA ta basa riba 17 hotel miembro: Amsterdam Manor Beach Resort, Barceló Aruba, Boardwalk Hotel, Brickell Bay Beach Club, Bucuti & Tara Beach Resort, Divi & Tamarijn All-Inclusive, Eagle Aruba Resort, Holiday Inn Resort Aruba, Hyatt Regency Aruba, Manchebo Beach Resort, Marriott Aruba & Stellaris Casino, The Mill Resort, Renaissance Aruba Resort, The Ritz-Carlton, RIU Palace, RIU Antillas y Talk of the Town Hotel. 

<< < Vorige 1 2 3 4 5 6 7 8 9 10 Volgende > >>