VicksWeb upgrade Location upload ads trending
VicksWeb Aruba

Welkom bij VicksWeb™

Flag Counter

© 2016 VicksWeb Inc.

Over | Privacy | Hulp | Voorwaarden | Feedback | Beveiliging | Diensten

FUNDACION LOTTO PA DEPORTE TA KEDA CUMPLI CABALMENTE CU SU DEBERNAN PA CU ARUBA SU DEPORTE
Source:  Cool FM 98.9 Aruba
maandag 14 oktober 2019 08:37

Siguiendo desaroyonan encuanto e retonan den su seno, Stichting Fundacion Lotto Pa Deporte (“FLPD�) ta comprende cu esaki por trece incertidumbre encuanto su tarea principal cu ta aporte financiero na Aruba su deporte. Pa medio di esaki  FLPD kier a tuma e oportunidad pa comunica cu no obstante retonan interno entre hunta directiva, maneho y gobierno, cu aporte na deporte ta sucediendo cabalmente segun palabracion y disponibilidad financiero di e organisacion.

 

Claridad riba structura

FLPD a tuma nota cu ainda tin hopi confusion riba e structura, generacion di fondo y aporte di esaki na deporte di Aruba. Desde restructuracion di FLPD na 2011, FLPD a permanece como e ‘vergunninghouder’ di loteria y na 2011 a cede operacion di sorteonan di e loteria, benta, pago y infrastructura tecnologico na Canadian Bank Note (Aruba) N.V. Como tal, Canadian Bank Note (Aruba) N.V. ta maneha e productonan conoci di Lotto y ta responsabel pa mensualmente otorga contribucionnan contractual na FLPD cu na su turno ta distribui e fondonan recauda pa e loteria di Aruba na Stichting Sportsubsidie Aruba (S.S.A.). Esaki na su turno ta distribui esaki na numeroso federacionnan y organisacionnan deportivo na Aruba, cumpliendo asina cu e proposito di e fundacion di aporta na Aruba su deporte.

 

Retonan

Hunta di directornan di FLPD ta sinti cu awor mas cu nunca mester fortifica e structura di e fundacion, cu na 2011 a enfrenta bancarota y di unda a cede e tarea di operacion na Canadian Bank Note (Aruba) N.V. cu resultadonan faborabel y positivo. Lamentablemente durante ultimo añanan Fundacion Lotto Pa Deporte a permanece un punto di polemica cu indole politico. No obstante di esaki, Fundacion Lotto pa Deporte ta cumpli cabalmente cu su debernan principal cu ta otorga fondonan na Stichting Sportsubsidie Aruba. E contribucionnan miyonario na nos deporte lastimamente a wordo obscureci pa polemicanan interno como politico. Resultado di esaki a atacha reputacion di e fundacion den comunidad y a invalida e gran aporte di FLPD na Aruba, no solamente atravez di deporte, pero tambe e aporte economico como vergunninghouder di e loteria cu e fundacion ta brinda. Esaki a wordo refleha den un rapport di Centrale Bank van Aruba, unda e percepcion publico di e fundacion a resulta di ta uno negativo y cu e fundacion no ta inspira confiansa den comunidad. Esaki hunta di directiva ta tuma hopi na serio y ta dispuesto pa coregi esaki den forma proactivo.

 

Solucion y continuacion

Cu speransa di mehora dialogo cu gobierno y otro stakeholders e hunta di directiva y directiva actual activamente ta evaluando posibel solucionnan pa remedia y recobra e confiansa di comunidad en general. Mientras cu ta evaluando fuentenan nobo di entrada, FLPD lo comunica regularmente den forma transparente encuanto fondonan ricibi como tambe fondonan otorga na instancianan deportivo. Fundacion Lotto Pa Deporte ta para pa desaroyo di deporte di Aruba atravez di bienestar deportivo y social di henter nos isla den forma sostenibel y duradero.


Inscripcion pa Landsexamen 2020 mavo/havo/vwo
Source:  Cool FM 98.9 Aruba
vrijdag 27 september 2019 08:00

Inscripcion pa landsexamen 2020 ta tuma lugar den e periodo di 2 di september pa 30 di september 2019. Entrante 2 di september 2019 e formulario pa inscribi ta obtenibel via e website di Departamento di Enseñansa Aruba www.ea.aw (bou di letter L di landsexamen).

Prome cu baha e formulario pa inscribi, por fabor lesa e “Informatiebrochure Landsexamen 2020�.

Entrega e formulario hunto cu copia di tur documento necesario (p.e. certificado , diploma y e listanan di cifra obteni cu firma oficial) y copia di un extracto di registro di Censo di Aruba na balie di Examenbureau, Belgiëstraat 2. Tambe mester entrega un copia di e prome pagina di e formulario di inscripcion yena como prueba cu a entrega e formulario di inscripcion.

Candidatonan cu ta cumpli cu tur regla di inscripcion y a pasa e “screening� ta wordo notifica pa pasa entrega un copia di e recibo di pago di por lo menos 1 materia (vak).

Si no entrega tur documento necesario of si e inscripcion drenta despues di dia 30 di september 2019, no ta procesa e inscripcion.


IBISA ta informa: DIA MUNDIAL DI CURASON
Source:  Cool FM 98.9 Aruba
donderdag 26 september 2019 16:30

Dia 29 di september ta dia Mundial di Curason. Riba e fecha aki hopi pais na mundo ta pone atencion riba e salud di e curason, specialmente riba e pasonan cu por tuma pa preveni malesanan di curason y ader (malesanan cardiovascular).

Malesanan di curason y ader ta actualmente e causa di morto number uno na mundo, segun World Health Organization (WHO). Y na Aruba esaki tambe ta e caso. E hecho aki no ta un sorpresa pa motibo cu e cantidad di persona cu ta sufri di malesanan cronico y/of cu tin un of mas factor di riesgo, a aumenta na Aruba y rond mundo. E factornan di riesgo y malesanan cronico mas comun ta: Stress, Obesidad, Falta di Actividad Fisico, Abuso di Alcohol, Humamento, Colesterol halto, Diabetes, Presion Halto y Enfermedad di Riñon.

Continuando cu e campaña ‘Sa Bo Numbernan’ IBiSA ta bay realisa diferente chekeo di salud durante luna di September y Oktober. IBiSA lo haci chekeo den sector priva pero tambe ta ofrece pueblo en general 6 dia di screening completamente gratis di Colesterol, cintura y BMI (Body Mass Index). Banda di esaki ta duna informacion pa haci cambio den e sistema di biba pa uno mas saludabel.

Fechanan pa e screening pa publico ta lo siguiente:
28 di september na Fitville for di 2:00 pa 6:00 PM
29 di september na Fitville for di 2:00 pa 6:00 PM
30 di september na MFA Noord for di 9:00 AM pa 3:00 PM

1 di october na PriceSmart for di 9:00 AM pa 3:00 PM
2 di october na MFA Savaneta for di 9:00 AM pa 3:00 PM
3 di october na Superfood for di 9:00 AM pa 3:00 PM

IBiSA ta invita henter e comunidad di Aruba pa probecha y participa na un di e chekeonan di salud.


Ta recorda tur cumprado di rifa di Facultad di Arte y Ciencia (FAS) cu rifa lo tuma lugar 2 di october 2019
Source:  Cool FM 98.9 Aruba
donderdag 26 september 2019 10:51

E Faculta di Arte y Ciencia (FAS) di Universidad di Aruba (UA) ta corda pueblo di Aruba cu e studiantenan ta bende rifa pa yuda cubri gasto di un biahe educacional na October proximo. E meta di e rifa ta pa e studiantenan por colecta fondo pa paga nan ticket, estadia y transporte. Ta pidi tur comerciante y e comunidad henter pa coopera ya cu di e forma aki studiantenan ta haya e
oportunidad pa amplia nan experiencia y conocemento riba nivel practico/internacional.

E programa practico/internacional ta pa studiantenan di Social Work and Development (SW&D) y e studiantenan di e programa di estudio Organization, Governance, and Management (OGM). E studiantenan di SW&D ta biaha pa Costa Rica y OGM ta biaha pa Washington DC. E meta di e biahenan aki ta pa stimula e studiantenan pa aspira pa sigui studia (pa un Masters), pa haya experiencia internacional, pa amplia nan perspectiva teorético y pa nan experiencia con ta aplica e teorianan cu nan ta studia den e cursonan por medio di diferente proyecto cu lo bishita na e destinacionnan ya menciona.

E rifa lo tuma lugar den ora di merdia (lunch) y lo ser supervisa dor di Notario Sr. Johnson. Por follow nan riba Facebook pa noticia tocante nan rifa: University of Aruba: Organization, Governance and Management – OGM.


Kico Bisa Ora Un Hende Tira Un Chiste of Mal Chansa Fo’i Sla?
Source:  Cool FM 98.9 Aruba
woensdag 25 september 2019 17:30

Kico bisa ora un hende haci un chiste cruel of fo’i sla tocante e trastorno neurocognitivo di tipo Alzheimer? No tur chiste tocante Alzheimer ta gracioso of bon bini. Bo por ta sigur cu comentarionan tocante un of otro forma di trastorno neurocognitivo (leve of mayor), malesa, of di cualkier otro condicion cu ta haci dolor ta chistenan cu mester pasa pa pasado.

Aki ta sigui algun sugerencia cu por yuda combati e stigma asocial cu e trastorno neurocognitivo di tipo Alzheimer. Laga nos elabora un tiki riba kico NO bisa un persona cu Alzheimer of otro condicion neurocognitivo. Un mal escogencia di palabra por ta tanto doloroso como frustrante. Siguientemente algun palabra y pregunta pa evita.

Pero kico ‘stigma’ kiermen? Aki un definicion: ‘stigma’ ta un actitud denigrante haci pa un persona na un otro persona. Esaki por ensera insulto contra rasa, religion, apariencia fisico, habilidad, descapacidad, etc. Stigma ta un forma di discriminacion. Hopi hende afecta pa un condicion neurocognitivo ta vocifera cu nan a experiencia diferente grado di stigmatisacion na cierto momento despues di un diagnostico.

Aki ta sigui algun ehempel den seno familiar of cu conoci:
– Mi no kier wordo contamina cu Alzheimer.
– Bo no ta mustra cu bo tin Alzheimer!, of No por ta cu abo tin Alzheimer, esaki mester ta un eror di e dokter, etc.
– Miembronan di famia por distancia nan mes despues cu nan a haya e noticia di un diagnostico.
– Amigonan no ta comunica ni bishita mas despues di un diagnostico relaciona cu Alzheimer.

Esakinan ta algun kehonan vocifera pa hende afecta cu un condicion relata na Alzheimer:
Comentarionan realiza pa publico, riba caya, den tienda, den transporte publico.
Un tipo di stigma cu a para bira mas comun ta: “chistenan� desagradabel y comentarionan haci den rednan social. Esakinan normalmente ta referi na, por ehempel, un colega na trabou (cu probablemente ta den un fase tempran di un of otro condicion (neuro)cognitivo y cu a lubida su yabi di auto, of a lubida un nomber, etc.)

Tweet recien di un “chiste�: Esaki ta uno di hopi comentario y chistenan doloroso cu por observa riba e red social y ta un forma di stigma cu no ta wordo cuestiona y ta wordo tolera.
Comentarionan inapropia, ofensivo manera esaki, ta solamente aumenta e stigma cu ta relaciona cu ‘Probabel Alzheimer’ y un diagnostico.

Humor como un mecanismo di escape of insiguridad
Mientras cu nos mes sa di tira un chiste fo’i sla of cu por ta doloroso pa un otro, nos por compronde tambe cu na otro banda e famia, amigo, cuidador y hasta e persona afecta, por usa chiste y humor como un forma di lidia cu con nan mes ta sinti e momento ey. Sa pasa hopi cu cuidadornan ta yama y conta di momentonan alegre y hasta divertido di biba cu un diagnostico. Ta importante encurasha nan pa keda comparti momentonan asina tambe.

Cada experiencia di un condicion neurocognitivo relata na Alzheimer ta diferente – nos ta compronde y acepta esaki tambe.

E tipo di chiste/broma cu nos kier cuestiona ta esunnan cu ta haci dolor y comentarionan tocante un condicion (leve of mayor) di tipo Alzheimer, cu ta basa riba malinformacion di esnan afecta of e cuidadornan. Esakinan ta eleva e stigma asocial cu e condicionnan y por tin un impacto negativo riba esnan afecta cu ainda por lesa, mira of scucha esaki.

Algun tips pa yuda kibra e stigma di un condicion di trastorno neurocognitive, leve of mayor:

Si abo ta experiencia comentarionan ignorante of chistenan desagradabel, por bien ta cu bo ta sinti e deseo di coregi of educa e hende cu ta haci esakinan.

Aki ta sigui algun conseho con pa yuda nos kibra e stigma asocia cu chistenan doloroso/desagradabel/fo’i sla riba e condicion di trastorno neurocognitivo:
1. Mira e persona, NO e condicion of su malesa.
Corda e persona cu haci bofon of conta un chiste di un condicion neurocognitivo NO ta defini e persona su personalidad of su bida.
2. E No ta divertido pa tur hende.
Puntr’e con e persona cu e condicion aki lo sinti ora e wak of scucha e comentario/chiste? Loke un persona ta haya chistoso, hopi lihe por bira ofensivo serca e otro!
3. Chiste cruel ta contribui na stigma.
Splika e hende cu comentarionan y chiste ignorante ta sirbi solamente pa aumenta e stigma rondo di e trastorno neurocognitivo di tipo Alzheimer y condicionan relata. Door di keda conta e chistenan desagradabel aki ta haci cada biaha mas dificil pa kibra e stigma pa e hendenan afecta cu e condicionan aki awo y tambe den futuro.
4. No saca informacion incorecto.

Hopi chiste desagradabel por haci hopi dolor y ta basa riba estereotiponan, malinformacion y mitonan. Laga e hende sa cu e por haya informacion confiabel y di fuentenan fidedigno tocante e condicionan (leve y mayor) aki y tambe di e condicionan cu ta reversibel.
Tambe ta posibel pa comparti bo experiencia personal riba nos Facebook: Fundacion Azheimer Aruba (F.A.A.) y/o Bisa No na Abuso di Anciano.
5. Sea semper habri pa siña mas.
Asisti na nos lecturanan y lesa tocante e temanan aki ta un bon manera pa siña mas y cambia comportamento.


COMPETENCIA DI ARTE ORGANIZA PA NAGICO TA HIBABO MIAMI PA 5 DIA
Source:  Cool FM 98.9 Aruba
dinsdag 24 september 2019 10:20

ORANJESTAD – Dialuna atardi na BAZ-RRR Galleria & Brasserie, NAGICO Insurances a anuncia nan concurso ‘NAGICO Carnaval Art Contest’, unda lo duna hobenan entre edad di 13 pa 20 aña e oportunidad pa demostra nan talento cu un obra di arte inspira door di nos dushi musica di carnaval. E diseño ganador lo ta e inspiracion pa cu NAGICO su diseño di carnaval cu lo wordo instala riba trailer di differente banda musical, cual lo duna e hoben talentoso aki reconocimiento y fama. Adicionalmente, NAGICO lo regala e hoben ganador 2 pasashi ida y buelta pa Miami, cu lo inclui estadia pa 5 dia y tambe un tour den e districto conoci di arte Wynwood. NAGICO ta invita tur hoben creativo pa participa den e ‘NAGICO Carnaval Art Contest’. E ganador ta wordo anuncia 4 di december 2019.

 

Con por participa?

Cada participante tin cu entrega un diseño cu e tema ‘Musica’. Algun di e reglanan ta cu e diseño crea mester ta den forma abstracto y atractivo pa tur generacion. Por haci uzo di ‘mixed media’ pa presenta e creacion. Naturalmente e diseño mester ta uno unico, crea specialmente pa e competencia. Esencial tambe ta cu e mester inclui e icono di NAGICO su logo esta e paraplu. E ultimo dia pa entrega esaki ta diabierna 29 di november 2019. Por entrega esaki via email na marketing.aruba@NAGICO.com of personalmente na NAGICO situa na Dakota of Savaneta. E formulario di inscripcion y tur e reglanan ta disponibel riba e pagina di Facebook di NAGICO: NAGICOInsurancesAruba.

Participa den NAGICO su workshop gratis

Un workshop pa e participantenan lo wordo duna pa e conocido artista Vanessa Paulina y lo ta gratis pa tur cu ta desea di participa den e competencia. E workshop lo tuma lugar dia 7 di oktober pa 12 di oktober na BAZ-RRR, situa na comienso di caya grandi. Durante e workshop, Vanessa lo duna un introduccion na musica y herencia di nos carnaval. Tambe e lo elabora riba varios tecnica di arte cu lo yuda e participantenan cu un diseño fuerte. Pa inscribi pa e workshop por tuma contacto cu NAGICO via marketing.aruba@NAGICO.com of via nan pagina di Facebook.

 

Mas informacion?

Bishita nos pagina di Facebook NAGICOInsurancesAruba of tuma contacto cu NAGICO via 588-7000.


World Alzheimer Report 2019
Source:  Cool FM 98.9 Aruba
maandag 23 september 2019 17:00

Investigacionnan extensivo mundialmente tocante Trastorno Neurocognitivo (TNC), (antes yama Demencia), ta revela cu:

  • dos tercera (2/3) parti di hende ta pensa cu un condicion di Trastorno Neurocognitvo ta normal den e proceso di envehecemento, en bes di un condicion medico/ neurologico.
  • Aki 95 porciento di e respondientenan ta pensa di tin chens pa desaroya un di e condicionan di Trastorno Neurocognitivo (TNC) durante nan bida.

Un investigacion cu 70,000 respondiente den 155 pais ta revela cu:

  • 2 den cada 3 persona ainda ta pensa cu un condicion di TNC ta normal den e proceso di envehecemento.
  • 62 porciento di profesionalnan den salubridad ainda ta pensa cu un condicion di TNC ta normal den e proceso di envehecemento.
  • Mas o menos 50 porciento di personanan cu ta biba den un condicion di TNC ta sinti nan mes ignora door di profesionalnan den salubridad (dokter y nurse).
  • 1 den cada 5 persona (20%) ta atribui un condicion di TNC (Mayor) como: ‘mala suerte’. Casi 10 porciento como boluntad di Dios y 2 porciento ta atribui esaki na bruheria.
  • Cada 3 seconde un persona na mundo ta cuminsa desaroya un condicion di TNC

“London School of Economics and Political Science� (LSE) a haci e analisis di e investigacion mundial aki.

E rapport aki ta revela cu stigmatisacion di un condicion di ‘TNC’ ta preveni cu hende ta busca informacion, conseho, apoyo y ayudo medico cu por yuda mehora e duracion y calidad di bida dramaticamente. Globalmente condicionan di TNC ta creciendo hopi lihe como e motibo di fayecimento.

Ta wordo calcula cu pa aña 2050 e cantidad di persona cu un di e condicionan cu ta resorta bou di TNC lo triplifica te mas cu 152 miyon compara cu awendia cu ta un 50 miyon.

“Stigma ta e barera mas grandi cu ta limita tur hende na mundo pa mehora e manera con nan ta biba cu un di e condicionan di TNC dramaticamente.�asina Paola Barbarino, director di Alzheimer Disease International (ADI), a bisa.

Tambe e rapport ta revela actitudnan asombroso tocante condicionan di TNC. Den e investigacion a inclui respondientenan cu ta biba den un condicion di TNC mayor, cuidadornan, profesionalnan den salubridad y publico en general. Un causa principal di preocupacion den e rapport aki ta e cantidad di hende na mundo cu ta pensa cu un condicion di TNC ta un parti normal di envehecemento.

Cuarenta y ocho porciento (48%) di e respondientenan ta kere cu problema cu memoria den un condicion di TNC nunca lo mehora, ni maske cu tin apoyo medico, mientras un den cada cuatro (25%) persona ta pensa cu nada por wordo haci pa preveni un condicion di TNC. Esakinan ta bareranan grandi cu ta preveni hende di busca ayudo, conseho y apoyo.

E rapport ta revela cu stigmatisacion di un condicion di TNC hopi biaha ta bai man den man cu stigmatisacion asocia cu salud mental / psiciatrico, enfocá riba edad y accentua door di falta di disponibilidad di tratamento medico. En realidad, hopi forma di apoyo ta existi rond mundo. Combersamento y planeamento por yuda hende pa biba mas bon y mas largo posibel den un condicion di TNC.

Den e rapport ta constata cu 50 porciento di respondientenan cu ta biba den un condicion di TNC ta sinti nan mes ignora door di profesionalnan den salubridad (dokter y nurse), mientras 33 porciento di respondiente cu ta pensa cu si ta tin un condicion di TNC, nan lo NO wordo scucha door di dokternan y otro profesionalnan den salubridad.

Interesante ta cu 95 porciento di e respondientenan ta pensa cu si nan lo desaroya un condicion di TNC den nan bida y mas cu dos tercera parti di nan (69.3%) lo haci un test genetico pa sa si nan tin riesgo di haya un condicion di TNC (maske cu actualmente no tin un tratamento pa evita e malesanan di e tipo Alzheimer). Sinembargo, dos tercera parti di e respondientenan ainda ta pensa cu un condicion di TNC ta un desaroyo natural di envehecemento. E miedo di desaroya un condicion di TNC serca hende ta halto. mundialmente, pero e comprendemento real di e malesanan di tipo Alzheimer ta bou. Esaki ta hopi preocupante pasobra un condicion di TNC tipo Alzheimer y otro condicionnan di TNC ta e di 5 condicion mundialmente cu a final por conduci na fayecimento.

Combersashon y consultashon tocante e condicion di TNC ta yuda maneha e stigmatisacion, normalisa e lenguahe y encurasha hende pa busca ayudo, conseho y apoyo. “Stigmatisacion ta sali for di miedo/inseguridad. Miedo ta genera silencio, y na su turno ta persisti den ignorancia y malcomprendemento.

Cada 3 seconde un persona na mundo ta cuminsa desaroya un condicion di TNC, sinembargo mayoria di nan NO ta wordo diagnostica of ta ricibi opoyo. Actualmente e gasto annual relaciona cu condicionnan di TNC ta mas cu 1 triyon (1,000,000,000,000) Dollar Mericano – un cifra cu lo redobla pa 2030. Fayecimento cu wordo conduci pa un condicion di TNC a redobla entre 2000 y 2016, haciendo esaki e di 5 causa na 2016 cu ta conduci na morto, mundialmente; na 2000 e tabata na di 14 luga.

Falta di conocemento riba un condicion di TNC ta resulta den suposicionnan incorrecto relata na e efecto di un di e condicionnan aki riba e persona y su famia. Igualmente ta e caso ora trata stereotiponan negativo tocante con un persona den un condicion mayor di TNC lo comporta su mes.

Tin evidencia cu ora cu un persona cu tin un condicion di TNC y su famia ta bon prepara y apoya, e sentimento di shock, rabia y duele ta wordo balansa door di seguridad y empoderamento, p’esey e enfasis riba e campaña global ta riba “aumenta e conversacionnan rondo di condicion di TNC�.

Den un siguiente articulo FAA lo publica cifranan relata na Aruba su situacion.

Traducion: Fundacion Alzheimer Aruba (FAA).


CONFERENCIA PA DIA MUNDIAL DI TURISMO 2019 CU PRESENTACION DI ORADADOR EXPERTO
Source:  Cool FM 98.9 Aruba
maandag 23 september 2019 08:19

Oranjestad – Celebracion di Dia Mundial di Turismo ta un ocasion den cual Oficina di Turismo ta tuma e oportunidad pa, no solamente conscientisa comunidad riba e importancia di e industria pa nos pais y celebra tur e individuonan cu nan trabou diario ta carga esaki; pero tambe pa comparti conocemento cu ta habilita tur partido envolvi pa alcansa e obhetivonan di ‘best practices’. Dia Mundial di Turismo ta celebra riba 27 di september y en conexion cu esaki, A.T.A. ta organisa su conferencia anual.

 

‘Turismo y Trabao: un miho futuro pa tur!’, ta e tema decretal pa United Nations World Tourism Organization pa e Dia Mundial di Turismo 2019. Banda di e conferencia anual unda A.T.A., manera custumber ta invita tambe studiantenan di EPI y di Universidad di Aruba, e aña aki, Oficina di Turismo ta tuma e inciativa pa bishita diferente skolnan rond di nos isla pa asina conscientisa nos studiantenan di kico ta turismo, dicon esaki ta importante, ken A.T.A. ta y kico ta e trabaonan cu A.T.A. entre otro ta haci diariamente y mucho mas.

 

BISHITA NA SCOLNAN

Durante e bishita na e scolnan MAVO, representantenan di A.T.A. fuera di amplia riba e temanan menciona lo splica tambe di e programa ‘My Promise to Aruba/ Mi Promesa na Aruba’. Aki ta encurasha, no solamente e studiantenan/localnan, pero tambe nos bishitantenan pa cuida nos isla. Entre e promesanan ta, pa no haci daño ni destruccion na nos medio ambiente, cultura y pa yuda proteha nos isla pa e generacionnan cu ta bin. E ‘Mi Promesa na Aruba’ ta inclui conductanan desea y informacion cu lo brinda un y tur cu reglanan / conducta cu kier mira di nan. Peticion ta pa respeta y sigui esaki. Siguiendo y respetando esaki, lo yuda aporta na un desaroyo sostenibel unda ta salvaguardia nos patrimonio natural y cultural, entre otro.

 

CONFERENCIA

E conferencia riba e dia aki ta conta cu presentacion di orador Paul Brady kende ta Editor Strategico di e compania SKIFT. E palabra ‘skift’ ta significa ‘transformacionnan y/of cambianonan clave’ den e idioma nordico. Señor Brady ta cubri e industria di biahe pa mas cu 10 aña trahando cu diferente media di comunicacion mundialmente. Na SKIFT, Paul Brady ta yuda diferente marcanan renombra identifica tendencianan nobo y con pa mercadea nan marca miho na mundo. E compania ta un di e plataforma di inteligencia mas grandi cu ta proporciona media di comunicacion, ideanan y mercadeo na sectornan clave di biahe.

 

E siman aki ta marca siman di turismo y Oficina di Turismo ta desea tur miembro di dicho sector un feliz Dia Mundial di Turismo. Tuma e momento pa refleha y renoba nos compromiso pa cu e profesionalismo, nos nivel di servicio y pa brinda e miho experiencia posibel na tur bishitante cu nos isla ta ricibi. Esaki ta bon pa nos turismo, pero e ta bon pa nos comunidad tambe principalmente.


Pa un mucha por crece sano, e mester sinta menos y hunga mas
Source:  Cool FM 98.9 Aruba
dinsdag 17 september 2019 13:15

ORANJESTAD: Muchanan bou 5 aña mester pasa menos tempo sinta mirando un pantaya of faha den un stoel of stroller. Pa un mucha por crece sano ta nesesario pa e drumi bon 8 ora of mas y pasa suficiente tempo hungando activamente. Esaki segun e instruccionnan nobo publica door di ‘World Health Organization’ (WHO).

Un comision di profesionalnan di WHO a desaroya recientemente instruccionnan nobo riba actividadnan fisico y comportacion activo pa muchanan bou di 5 aña. Esaki despues cu nan a evalua e efectonan di mal drumimento y e tempo cu muchanan chikito ta pasa no activo sea sinta mirando pantaya of faha den un stoel of stroller. Y tambe despues di a revisa evidencia rond di e beneficionan cu aumento di actividad tin serca mucha.

Baby menos di 1 aña mester:
Ta fisicamente activo varios bes pa dia den diferente forma, particularmente door di weganan interactivo riba vloer. Pa esunnan cu ainda no por move bon, ta sugeri un minimo di 30 minuut pa dia den un posicion boca abou, ora e ta lanta.

Ta recomenda pa no faha baby pa mas cu 1 ora den ‘stroller’, ‘highchair’, ‘carseat’ of ‘bouncer’. ‘Screen-time’ den forma di television, tablet of cualkier artefacto electronico no ta recomendabel. Ora cu ta momento pa relaha ta wordo conseha pa lesa un buki, conta storia y canta cu e baby. Entre 0 pa 3 luna un baby tin pa drumi entre 14 pa 17 ora pa dia y un baby entre 4 pa 11 luna mester drumi entre 12 pa 16 ora. E interaccion entre actividad fisico, tempo pa relaha y drumimento adecua y su impacto riba e salud fisico, mental y bienestar a wordo reconoci pa e “Comision pa pone un fin na obesidad infantil�.

Door di aplica e recomendacionnan duna, durante e prome 5 añanan di bida di un mucha lo contribui na e desaroyo motorico, cognitivo y na salud di e muchanan pa bida largo.


Aruba Beach Tennis Open 2019 lo tuma lugar na Bushiri Arena
Source:  Cool FM 98.9 Aruba
dinsdag 17 september 2019 08:15

Oranjestad: Tur esnan cu ta pasa diariamente riba LG Smith Boulevard, pa ser exacto dilanti AMC Unicon nobo, por a tuma nota cu e tereno caminda ex Bushiri School tabata sitúa, a wordo será y trabao nan tabata andando. Hopi lo a puntra, kiko ta pasando?

Awe, nos di Beach Tennis Aruba por oficialmente informa y confirma pueblo henter, cu e torneo mas grandi e importante di Aruba lo tuma lugar na Bushiri Arena. E área aki lo wordo  completamente transforma, lo acomoda mas veld compara cu añanan anterior. Durante e ultimo lunanan a tuma un destaho, pa asina por a jega na e compania cu lo bai hasi e transformacion aki. E compania cu a gana e bid ta C2 Civil & Construccion ta esnan encarga pa segura cu e tereno ta cla den 4 siman di tempo.

Sigur nos di Beach Tennis Aruba, kier a gradici tur esnan cu a hasi esaki posibel. Awo cu tur cos ta confirma, e team di mercadeo a activa completamente pa asina por segura cu jega na e cantidad di participantenan of mas, compara cu e añanan anterior. Si nos por remarca caba, cu inschrijving ta drentando riba e mes un nivel compara cu 2018. Nos di BTA ta sigur cu tur esnan cu presencia e torneo, cual lo tuma lugar entre 6-17 november 2019, lo no sinti ningun cambio, cu no ta unicamente e localidad di e evento.

E cambio aki lo trese cune hopi beneficio: mas espacio pa pone mas court, mas espacio pa parkeer, trafico no lo wordo afecta manera na Eagle Beach. E beach rond di e arena lo wordo drecha, y asina nos por menciona hopi mas, pero nos lo laga esaki pa nos por informa boso tur debidamente mas nos ta jegando e luna di e torneo. E aña aki, un biaha mas, pa di 4 aña consecutivo, Aruba lo ta e anfitrion di e Panamerican Beach Tennis Championship, cual lo cuminsa e prome dia na e club di Beach Tennis Aruba, pero e semi-final y e final lo tuma lugar na Bushiri Arena.

Nos kier a invita cada un cu kier participa na e torneo, pa please subi nos website www.arubabeachtennisopen.com, eyriba bo ta haña tur informacion necesario y inscribi pa segura bo participacion.


<< < Vorige 1 2 3 4 5 6 7 8 9 10 Volgende > >>