VicksWeb upgrade Location upload ads trending
VicksWeb Aruba

Welkom bij VicksWeb™

Flag Counter

© VicksWeb Inc.

Over | Privacy | Hulp | Voorwaarden | Feedback | Beveiliging | Diensten

Aruba Ta Desea Un Cambio, Y MEP Ta Prepara Pa Brinda Esaki
Source:  Caribseek News - Aruba
maandag 06 maart 2017 10:30

Partido MEP Preparando E Solucionnan Pa Problema Di Criminalidad Den Nos Pais
Aruba Ta Desea Un Cambio, Y MEP Ta Prepara Pa Brinda Esaki

PIEDRA PLAT (MEP) -- Den fin di siman e equipo di partido MEP a bolbe reuni henter un dia pa trata e diferente problemanan den nos pais, y con lo soluciona nan.

MEP ta den consulta cu varios persona y instancia na Aruba pa asina haya mas informacion di e situacion actual real den nos pais.

A base di esaki ta formulando e solucionnan cu lo trese e cambio tan espera pa nos pais. Di e reunionnan aki ta sali hopi bon ideanan, cu indudablemente lo cai den bon tera serca tur.

E tema cu mas a haya atencion ta e tema di insiguridad y criminalidad den nos pais. Ta importante pa inventarisa con serio e problema aki ta realmente, pa por apunta ken ta responsabel pa e problema serio aki. Y a base di esaki formula con lo bai atende. Manera cu lider di MEP Evelyn Wever-Croes y mas integrante di MEP a trese padilanti na varios ocacion, e prome prioridad mester wordo poni na control estricto na nos fronteranan pa controla ken ta drenta y cu kiko nan ta drenta den nos pais, y esaki naturalmente no ta regarda solamente e cuerponan den husticia, sino sigur tambe aduana. E helicopter mester bin bek y e radarnan tambe. 

Una bes nos costanan ta bon vigila, por cuminsa pone orden den cas, cu man duro pa trese bek orden y respet. Esaki ta algo cu e gran mayoria den nos comunidad ta desea fervientemente, y tur hende sa cu ta MEP ta e unico partido cu por logra esaki. AVP a purba pa 7 aña, pero a hasi e situacion peor. No tin hende cu ta kere mas cu AVP por hasi nos pais sigur bek. Demas partidonan tampoco a logra conbense ningun hende ainda. Pues lider di MEP y integrantenan di MEP ta conciente di e responsabilidad grandi cu tin riba nan lomba, y nan ta cla pa asumi e reto aki.

Language:

Tag:


Partido MEP Cu Varios Actividad Den Fin Di Siman
Source:  Caribseek News - Aruba
maandag 06 maart 2017 10:28

Partido MEP Cu Varios Actividad Den Fin Di Siman

ORANJESTAD (MEP) -- Candidatonan di partido MEP tabata tin un fin di siman hopi activo.

Diabierna anochi Ady Thijsen a organisa un encuentro ameno den bario di Savaneta, y na final di e anochi a rifa un auto. Hopi simpatisante di MEP tabata presente na e actividad ey.

Diadomingo mr Edgard Vrolijk a tene un MEGA BBQ pa recauda fondo, un actividad cu a wordo hopi bon atendi, y tabata "sold out" di trempan. 

Diadoming tambe Endy Croes tabata tin su fundraising "ON" cu Endy, caminda durante henter dia hopi hende a acudi na club Trappers pa deporte, entretenimento di e muchanan y na final di e anochi un fiesta bailable ameno den e club.

Hopi tabata e simpatisantenan di partido MEP cu a bishita tur e actividadnan aki, y hopi ta esnan cu no tabata simpatisa partido MEP cu awor a dicidi di uni nan mes na e fila geel. 

Por a nota na tur e actividadnan un deseo grandi pa cambio, y e speransa cu cosnan bon tin na caminda. Pabien Ady, Edgard, Endy y pabien MEP.

Language:

Tag:


Aruba Ta Kere Plenamente Den SDG Di Nacionnan Uni Y Ta Cla Pa Traha Hunto Pa Haci Nan Un Realidad Pa Mundo
Source:  Caribseek News - Aruba
maandag 06 maart 2017 10:26

Minister President Mike Eman
Aruba Ta Kere Plenamente Den SDG Di Nacionnan Uni Y Ta Cla Pa Traha Hunto Pa Haci Nan Un Realidad Pa Mundo

ORANJESTAD -- Minister President como tiular di Desaroyo Sostenibel y hefe di Gobierno di Pais Aruba tabatin e honor di realisa apertura di e Framework Workshop di Nacionnan Uni su Sustainable Development Goals (SDG).

E evento aki a reuni representantenan di sector publico, priva y sociedad civil cu ta participando activamente den e implementacion, riba nos isla, di e 17 metanan fiha pa Nacionnan Uni. Pa Premier Eman tabata un oportunidad ideal pa resalta e posicion y boluntad di su Gabinete pa brinda tur facilidad necesario pa alcansa e meta y pakico ta asina importante.

Minister Eman a indica cu no ta prome biaha cu Aruba ta afronta un reto y cu nos tin e capacidad dunando como ehempel e crisis economico cu a surpasa durante ultimo ocho aña, haciendo di cada obstaculo un oportunidad. Den pasado a impulsa crecemento den turismo cada bes cu tabata busca un crecemento economico, pero for di 2007 a ripara cu tabata haya falta di un conexion esencial entre e prosperidad economico y e bienestar social di nos comunidad.

Gobierno a busca manera pa tin no solamente hotelnan di cinco strea, pero tambe un bida di cinco strea dunando pueblo facilidadnan deportivo, espacionan publico di recreacion, mehoracion di facilidadnan publico manera scol, hospital, etc. Tambe a busca un miho entrada pa esnan di menos recurso atrabes di numeroso pakete di asistencia social. Naturalmente, ta purba di haci tur esaki den balance cu e vision di sostenibilidad y aunke no por bisa ainda cu nos tin tur e contestanan, e iniciativa di Nacionnan Uni pa paisnan rond mundo cumpli cu e 17 SDG, ta un confirmacion cu nos ta riba e direccion corecto y un sosten.

Esaki ta un oportunidad cu nunca antes a conoce. “Ken no ta pro di miho educacion, di caba cu pobresa? Nos tur por para tras di nan independientemente di nos perspectivanan riba politica, religion, rasa of cualkier otro dogma cu por afecta e manera cu nos ta wak bida,” asina Premier Eman a bisa. “Nos tin un punto enfoke specifico pasobra e metanan aki ta metanan noble cu nos ta haci esfuerso pa promove. Nacionnan Uni ta compronde esey ora cu nan a adopta e metanan y ta hopi entusiasma riba e manera con nan a wordo ricibi.”

Premier Eman ta kere cu esaki ta e posibilidad pa mundo, pa prome biaha, para tras di 17 meta cla cu lo afecta e calidad di bida di cada ciudadano riba tera pa hopi decada nos dilanti y esey ta loke ta haci e SDGnan asina special y fuerte. Siguientemente Minister President a gradici miembronan di e SDG Team di Aruba cu ta consisti di: Joyceline Croes, Zulema Dabian Erasmus, Maria Pita, Vivian Loopstok, Gerald Kock, Tyson Lopez, Andre Marin y Mark Croes. “Tur ta profesionalnan hoben hopi motiva y inspira cu ta cla pa traha cu tur stakeholder na Aruba pa en berdad haci un progreso grandi riba e SDGnan.”

News Category:

Language:


“Awo Mi Kier Busca Un Trabou Y Cu Dios Kier, Forma Un Famia”
Source:  Caribseek News - Aruba
maandag 06 maart 2017 10:23

Hoben Graduado Di Grupo 9 Formacion Social:
“Awo Mi Kier Busca Un Trabou Y Cu Dios Kier, Forma Un Famia”

ORANJESTAD -- Siman pasa Gian Pierre Rodriguez a ricibi su certificado como un graduado di e trayecto SVT/Formacion Social, pero ya caba su mente ta mas dilanti.

E ta entusiasma cu e potencial awo cu e tin un educacion y experiencia di trabou. Gian Pierre ta esun di mas contento cu su otro cuater compañeronan di Grupo 9 pasobra esaki ta su di dos intento den Formacion Social y finalmente el a logra. Mes contento tambe ta su señora mama y sobrinanan cu a compañe na e ceremonia di graduacion.

E hoben di 21 aña ta bin di e districto di Noord y ta conta con e mes a dicidi cu e ta bay pa e reto un biaha mas. “Tabata un decision di mi mes dor cu mi no a sigui scol mas; awo mi ta contento cu mi a haci esey,” Gian Pierre ta bisa.

Despues di a kita di scol sin gradua, el a purba haci trabounan aki' aya, pero ta den Formacion Social el a wak un perspectiva nobo y positivo. “E ta algo pa mi mes y sin un papel den mi man, mi no por haci nada. Awo mi kier sigui mehora mi mes, busca un trabou y cu Dios kier, forma un famia.” Gian Pierre ta buscando actualmente un trabou. E ta gusta area di carga y maneho di deposito.

Gian Pierre ta wak Formacion Social como algo hopi bon. E ta wak e programa cu Prome Minister Mike Eman a cuminsa cu ne varios aña atras, como un ayudo pa hopi cu kier bay dilanti. “Nan ta siña bo hopi disciplina,” e ta bisa. Adicional na e entrenamento militar pa cuater luna, e participantenan ta sigui varios estudio y despues ta core stage na un compania local. “E parti mas dushi ta cu nos a siña traha den grupo miho; e parti dificil tabata e prome luna cu nos no por a cera cabes hunto,” asina e ta conta.

Den su caso, Gian Pierre a pasa su entrenamento militar pa despues haya cursonan di Hulandes, Ingles, Papiamento, matematica, computer, desaroyo general, motivacion y comportacion. El a core stage den e departamento di mantencion di Divi Aruba Phoenix Beach Resort.

Mientras cu Grupo #9 di Formacion Social a finalisa, Grupo #10 ta na mitad di nan trayecto y inscripcion ta habri pa Grupo #11 cu ta start na fin di maart proximo. Pa mas informacion por bishita e pagina di Facebook ‘Formacion Social – SVT’, yega personalmente na e oficina na Marinierskazerne na Savaneta of yama na 522-5352/ 522-5545.

Language:


Gobierno Tin Oido Pa E Puntonan Di Camara Di Comercio Y Lo Continua Sinta Na Mesa Pa Atende Nan
Source:  Caribseek News - Aruba
maandag 06 maart 2017 10:21

Ernst Mohammed, President Di Camara Di Comercio:
Gobierno Tin Oido Pa E Puntonan Di Camara Di Comercio Y Lo Continua Sinta Na Mesa Pa Atende Nan

ORANJESTAD -- Diabierna atardi President y miembronan di hunta di directiva di Camara di Comercio a reuni cu Conseho di Minister di Gabinete Mike Eman II durante varios ora den cual a pasa dor di  diferente punto di atencion.

Na final ambos grupo a sali satisfecho dor di a intercambia informacion, pero tambe fiha un comprondemento caminda ta bay sinta hunto regularmente pa percura cu sector comercial di Aruba su interesnan ta keda atendi. President di Camara di Comercio, Ernst Mohammed a indica cu e reunion tabata uno hopi positivo, nan a keda satisfecho y a palabra cu ta sigui reuni.

“Nos a haya hopi informacion cu nos por asimila,” Mohammed a bisa. “Nos como camara tabatin hopi pregunta riba varios topico, entre otro CITGO y proyectonan cu Gobierno ta haci. Pero awo e informacion cu nos a tuma, nos ta bay bek den nos seno, nos ta bay asimile y nos tin un vervolg meeting cu ministerraad.” Mohammed ta sinti cu e puntonan cu nan a trece dilanti a wordo tuma na serio y esey ta un bon caminda unda nan kier bay.

Di e manera aki ta traha riba continuacion di bon relacion entre Gobierno y Camara di Comercio, cual ta e entidad priva su meta pa 2017, esta di trece hende, gobierno y negoshi hunto. “Economia di Aruba ta un parti hopi importante den nos bida. Nos ta wak cu e Gobierno aki tin esaki den mente, e tin oido pa loke camara ta trece dilanti, esey ta hopi importante,” Mohammed a declara.

Den menos di 30 dia lo sinta atrobe cu Conseho di Minister y tambe ta topa individualmente cu e Ministernan ya cu tin hopi pa discuti. Na e reunion di diabierna ultimo tabata presente Minister di Asuntonan General Mike Eman, Minister di Infrastructura Benny Sevinger, Minister di Turismo Mike de Meza y Minister di Asunto Economico Richard Arends.

Pa Camara di Comercio e prioridadnan ta hopi: “diversificacion di nos economia, educacion di empresarionan, haci leynan mas facil pa hende por lanta negoshi na Aruba, eliminando e ‘red tape’ y treciendo asina mas inversionista Aruba, pero mas tanto kier enfoca riba hobennan cu kier bira empresario y lanta negoshi; esey ta un di e enfokenan mas grandi pa Camara di Comercio e aña aki.

Gabinete Mike Eman II ta comparti e enfoke ey. President di Camara di Comercio mes a bisa cu den hopi di e puntonan varios minister ta interesa. Ainda no por divulga e proyectonan, pero tin varios iniciativa cu ta bay haci hunto cu Gobierno pa yuda empresarionan hoben lanta cabes.

Language:


Ta Great Cu Gobierno Ta Explora Posibilidad Di Un Efecto Mas Positivo Den E Comunidad Di Oranjestad
Source:  Caribseek News - Aruba
maandag 06 maart 2017 10:19

Ta Great Cu Gobierno Ta Explora Posibilidad Di Un Efecto Mas Positivo Den E Comunidad Di Oranjestad

ORANJESTAD -- Entre esnan cu a asisti na e presentacion di Goldman Properties algun dia atras organisa pa Oficina di Inovacion, ta Michael Lampe. E conocido artista musical di Datapanik, awendia tambe ta un miembro di e comunidad downtown Oranjestad.

Na edificio di ex El Mercado na Steenweg, Lampe a cuminsa cu un centro creativo; algo cu ta cuadra completamente cu e concepto di haci Oranjestad un experiencia mas amplio cu djis haci compras.

“Mi ta kere cu ta hopi importante, no solamente pa Aruba, pa yuda crea y forma nos identidad mas ainda pa e sector turistico pero tambe pa e progreso di nos hendenan mes cu atrabes di creatividad y arte por yuda hopi,” Lampe a comenta.

Como productor y mente creativo Arubiano, Lampe ta sostene e iniciativa di Gobierno pa busca conseho for di esnan cu ya tin e experiencia den con pa desaroya un bario cu hopi reto, den un destinacion cu atractivo internacional. Goldman Properties ta esnan responsabel pa e revitalisacion di Soho na New York, como tambe mas recientemente Wynwood na Miami.

Lampe: “Mi ta kere cu den e siguiente lunanan y den siguiente añanan, manera nos por wak loke ta pasando globalmente, comerciantenan ta hopi interesa no djis pa inverti den algo cu ta crea hopi cen bek, pero na mesun momento bo ta crea cen cu ta hinca den bo sociedad y ta yuda bo comunidad.”

E aspecto di empresarionan social ta loke BEAM kier ta un ehempel di dje. BEAM ta e centro creativo cu Michael Lampe ta dirigi. Hunto cu otro instancia ta yuda individuonan pa bira profesional y expresa nan mes ofreciendo un luga caminda nan por topa cu creatividad. Algo asina por tin hopi mas pa nos comerciantenan cu djis inverti den algo; e ta duna nan e satisfaccion y ta conecta cu posibilidad cu nan mes no a pensa cu tabatin.

“E ta un centro creativo na unda cu nos ta stimula tur nos creatividad riba e isla cu diferente idea, workshop, e ta un galeria, e ta un centro y espacio y edificio multifuncional cu nos ta stimulando nos sector creativo,” Lampe a splica. Nan tin les di canto pa mucha, pero tambe grupo di IPA cu kier hiba creatividad mas cerca di bario. Asina ta yuda Aruba shape su identidad y, claro, tambe e espacio Oranjestad ta haya su forsa atrabes di iniciativanan asina.

Michael Lampe ta contento di wak cu, contrario na e caso di Soho y Wynwood, aki na Oranjestad Gobierno ta dispuesto pa motiva y sostene e esfuersonan pa revitalisacion. Esey ta haci cu ta hopi mas facil pa drenta y crea un efecto positivo den caya y barionan. “Ta hopi interesante pa wak cu Gobierno ta pusha den e ramo ey tambe y ta explorando e posibilidadnan pa wak con esaki por tin un efecto positivo pa cu e comunidad rond di Oranjestad y mi ta kere esey ta algo great,” Lampe a bisa.

E ta añadi cu ta semper bon ora nos ta positivo pa wak unda nos por crece y esey ta intencion cu tin. “BEAM ta un iniciativa independiente, pero ta duna hopi apoyo ora cu ta ripara cu nos ta alinea riba unda nos kier bay y nos ta riba mesun liña unda cu por yuda y traha hunto pa na final di dia yuda Aruba crece y pone riba mapa.”

News Category:

Language:


"Hunto Cu Stakeholders, Nos Kier Haci Di Oranjestad Un Oferta Y Experiencia Mas Amplio"
Source:  Caribseek News - Aruba
maandag 06 maart 2017 10:16

Bianca Peters Di Oficina Di Inovacion
"Hunto Cu Stakeholders, Nos Kier Haci Di Oranjestad Un Oferta Y Experiencia Mas Amplio"

ORANJESTAD -- Oficina di Inovacion cu ta resorta bou di Ministerio di Asuntonan General, Ciencia, Innovacion, Desaroyo Duradero, Sector Primario y Cultura, ta cla pa ricibi tur esnan cu ta kere cu hunto por traha pa haci di Oranjestad, e siguiente Soho of Wynwood. Su director, Bianca Peters, ta na cabes di un ekipo di mentenan creativo cu hopi boluntad pa haci di nos centro di ciudad un destinacion mundial cu ta ofrece hopi mas cu djis compras. 

Na final di e presentacion duna pa Goldman Properties y cu a tuma luga algun dia atras na sede di Oficina di Inovacion, mayoria di esnan presente a bisa cu nan ta dispuesto pa haci di e obhetivo aki un realidad; algo cu ta entusiasma nan hopi. Entre nan tabatin ehecutivonan bancario, inversionista, comerciante y tambe artista. Situa na Kruisweg den curason di Caya Grandi, Oficina di Inovacion ta bon posicion pa ricibi tur esnan interesa den forma parti di e esfuersonan, mantene un bista cerca di e desaroyonan y ta den contacto continuo cu tur stakeholder.

Peters a splica cu Gobierno di Aruba a inverti masha hopi durante ultimo añanan den e renobacion di centro di ciudad, incluyendo Caya Grandi, Plaza Daniel Leo y henter e bicindario; cual algun proyecto relacion cu esey, ta actualmente den ehecucion. Adicional na e enfoke riba infrastructura, dos aña pasa Gabinete Mike Eman II a firma na Miamia un MOU cu Goldman Properties. E compania aki ta esun responsabel pa revitalisacion di barionan na Merca cu awe ta masha popular y bishita manera Soho na New York y Wynwood na Miami.

“Nan ta hopi bon den combina arte, cultura y historia cu e DNA di un cierto bicindario y esey ta loke nos ta desea di mira sosode na Aruba tambe,” asina Peters a bisa. “A desaroya Caya Grandi masha bunita cu cayanan nobo, pero tin otro sector cu por desaroya mas ainda; y no solamente desaroya pero hunto sinta pensa kico mas nos por haci na Oranjestad.” Gobierno ta di pensa cu e funcion como centro di compras ta sumamente importante, pero mester percura tambe pa por ofrece na local y bishitantenan otro tipo di experiencianan. Ta papia aki di restaurant, tayernan di arte, galerianan, etc.

E proximo paso den e esfuersonan aki ta cuminsa forma e contacto cu tur esnan cu ta kere den e vision aki y cuminsa traha riba acuerdonan concreto. Con pa hinca mas bida den centro di ciudad, con pa trece propietarionan di edificio y empresarionan nobo hunto den sociedadnan beneficioso pa ambos. Esnan cu kier haya sa mas di e movimiento aki y/of ta interesa pa forma parti di dje, por tuma contacto cu Oficina di Inovacion mandando un email na info@bi.aw of yamando 588-7075. Asina por sinta hunto y wak con por aporta na e revitalisacion y creatividad cu por inyecta den Oranjestad.

News Category:

Language:


AW
Source:  (Ad) VicksWeb Advertising
dinsdag 21 februari 2017 08:43


<< < Vorige 11 Volgende > >>