VicksWeb upgrade Location upload ads trending
VicksWeb Aruba

Welkom bij VicksWeb™

Flag Counter

© VicksWeb Inc.

Over | Privacy | Hulp | Voorwaarden | Feedback | Beveiliging | Diensten

210927
Source:  AWEMainta
maandag 27 september 2021 21:39


A destrui imagen di Santa Maria na misa di Santa Cruz
Source:  AWEMainta
dinsdag 06 juli 2021 01:46

Dialuna mainta a habri c’un caso hopi lamentabel na Misa Inmaculada Concepcion na Santa Cruz. E mainta aki, a bin topa cu imagen di La Virgen Maria, cu ta existi pa 150 aña, pero kibra benta na suela.

Jairo Maduro, Pastoor di Misa di Santa Cruz, a informa cu mainta tempran a kibra e imagen di La Birgen Maria cu ta poni den e grot dilanti misa. E imagen aki ta hopi bieu y historico. E imagen aki tin 150 aña y t’e prome cu a yega den historia na Misa di Santa Cruz.

Segun e pastoor, esaki ta realidad di comunidad di Aruba. Cu tur dia ta lanta cu tur sorto di sorpresa y cu e misanan no ta scapa di destruccion y vandalismo. Ken a haci tipo di acto asina aki, e pastoor no por bisa. Tipo di cos asina ta pasa anochi laat y den ora tempran di madruga.


Djis un splicacion di fayo di un chip simplemente no ta suficiente
Source:  AWEMainta
dinsdag 06 juli 2021 01:45

Gerencia di WEB Aruba NV a dicidi di yama un conferencia di prensa relaciona cu e problema grandi cu a surgi cu coriente diasabra y diadomingo, caminda e isla despues di hopi aña, a haya su mes den un completo blackout.

Un situacion cu a percura pa hopi incomodidad, pero na mes momento cu a percura pa perdida grandi den sector turistico y sector priva como tambe na problemanan serio di otro indolenan.

A spera mucho mas den e splicacion cu a wordo duna y ora cu scucha cu a trata di hustifica e blackout pa fayo di un chip chikito di un computer, simplemente e ta un falta di respet pa inteligencia di cualkier ser humano.

Sigur no ta cuestion di pasa algun ora sin coriente of den scuridad, pero tin otro asuntonan cu tambe ta hunga un rol importante ya cu den un tempo financieramente dificil cu tur hende ta pasando aden, hopi t’esnan cu ta trata di traha cuminda den fin di siman pa saca  un tiki placa pa asina nan por sobrebibi den e tempo dificil aki.

E falta di coriente sigur a pone varios di e actividadnan culinario aki fracaso caminda tin hende a perde placa y awor tin un debe mas grandi pa cubri.

E sector hotelero tambe a sufri miles di perdida, caminda negoshinan den e hotel, purbanda di lanta cabes bek despues di temponan dificil, atrobe a wordo confronta cu e fiasco grandi aki cu a tuma lugar na WEB Aruba NV.

Comestiblemenan cu a bay perdi pa motibo cu nan no por a wordo warda bou di un temperatura rekeri, tambe ta cay den e daño sufri aki, mientras cu tin famianan cu a perde aparatonan di electridad durante di e momentonan dificil ey.

Aparatonan medico na cas no por a funciona regularmente creando situacionnan di incomodidad cerca esnan cu tin mester di esakinan y asina por sigui menciona cantidad di otro problema cu a surgi cu e blackout inespera aki.

Teniendo tur e asuntonan aki na consideracion, e seriedad di e situacion cu a surgi den fin di siman, simplemente e splicacion di gerencia di WEB Aruba NV no tabata aceptabel ya cu pueblo a spera nan carga mas responsabilidad, nan carga mas culpa pa loke a sosode y no simplemente schuif henter e asunto aki riba un chip cu a bay off.

E chip aki mescos cu na practicamente tur parti di mundo, ta manda un señal un caminda cu tin problema cu un of otro boiler, el a bati alarma na cierto momento y e mensahe aki no a ser capta na su debido momento p’esun of esnan encarga cu e responsabilidad aki.

E alarma a bin te bay y e falta di atencion p’esaki a pone cu a surgi e blackout di diasabra  y cu a sigui te den oranan di diadomingo atardi.

Mescos cu a mustra pueblo e tipo di chip cu a flip y ocasiona e blackout aki, lo tabata na su lugar pa mustra tambe e funcionario encarga cu funcionamento di esaki p’asina pueblo conoce di cerca tambe e funcionario cu a faya den cargamento di su responsabilidad. Gerrencia di WEB Aruba NV a bin ta invirtiendo miyones y miyones den e planta aki pa algun tempo caba y e tipo di fayonan aki no por pasa den e forma cu esaki a pasa y na final di cuenta ningun hende ta carga responsabilidad p’esaki.


Tres hoben sospechso di asesinato tambe lo ta den Corte
Source:  AWEMainta
dinsdag 06 juli 2021 01:44

Dentro di tres dia lo tin aparace den Corte di Prome Instancia, tres hoben, kendenan ta wordo acusa di a asesina e hoben di 21 aña, Lisandro Ignacio dia 15 di januari ultimo den su auto dilanti di su cas na Pos Chikito.

Ta trata aki di e sospechosonan Wuill Vrolijk, Joshua Wouters y Yael Frans, kendenan a keda deteni algun siman despues di a comete e crimen aki, pero diabierna benidero e caso lo wordo trata den su totalidad, pero den como pro forma, loke ta nifica cu Hues lo dicta otro fecha pa tratamento total di e caso, cu probablemente lo tuma lugar na september.

PEDOFIEL

Diabierna tambe e conocido figura Jason Margarita, acusa di actonan di inmoralidad cu menornan di edad, tambe tin cu aparace dilanti mesa verde, pero den su caso tambe esaki lo ta pro forma, caminda tambe lo stipula un fecha nobo te cu luna di september posiblemente p’e ora trata e caso den su totalidad.

Ta trata di dos hopi serio caminda esun di Margarita a wordo hopi comenta caminda e tabata maneha un gym y lo a comete cierto acto cu hobennan menor di edad.


Un di cada tres famia tin problema serio pa cumpra cuminda
Source:  AWEMainta
dinsdag 06 juli 2021 01:43

AWEMainta a yega di cuestiona e hecho cu Banco Central di Aruba, na mas c’un ocasion a organisa encuesta riba “corupcion� y a haci esaki mirando cu na tur ocasion, a papia di un porcentahe di “percepcion� cu tin den pueblo pa loke ta corupcion.

Sinembargo ayera Banco Central a bati un alarma grandi pa tanto Gobierno como tur instancia riba e isla aki, caminda den un encuesta haci, a bin resulta di un di cada tres famia encuesta, ta mustra cu den ultimo 6 luna, nan tin problema pa pone cuminda riba mesa.

Un nivel di pobresa increibel, ocasiona p’e pandemia di Covid-19, pero cu sin duda mester ta liña di maneho pa loke ta recuperacion di Aruba su economia, labor y asuntonan social.
Ta cifranan impactante caminda Banco Central ta mustra cu en total el a papia cu 1300 famia den tur districto rond e isla, haciendo esaki den un sistema digital.

Un di e prome observacionnan cu a hala atencion serio, t’e hecho cu ta mustra cu 60% di famia rond Aruba, a wordo afecta ta pa perdida di entrada ocasiona p’e pandemia cu a paralisa economia di e isla pa gran parti.

Ta un cifra hopi halto cu sin duda a laga cu consecuencianan impactante atras y tambe informacion cu 50% di casnan na Aruba, tin un entrada menos cu 4 mil florin pa luna, mientras cu e promedio di entrada stipula pa un cas di famia, ta 4.200 florin pa luna.

Fuera di e perde entrada dor di e pandemia, e encuesta di Banco Central a mustra cu 30% di famia rond e isla, ta confirma cu nan tin demasiado debe y cu nan no por cubri nan gastonan mensual manera mester ta, creando asina mas situacion dificil.

Na mes momento e raport ta mustra cu solamente 20% di famianan cu no a sufri perdida di entrada, ta satisfecho cu nan situacion financiero, pero atrobe un cifra hopi alarmante cu mester ta un indicador con e proximo Gobierno tin cu bay traha.

Ora cu analisa e encuesta aki di Banco Central, ta cifranan cu den futuro mester forma parti di cualkier dialogo cu Gobierno Hulandes, cu CAFT, ya cu loke diabierna ultimo CAFT a mustra cu economia a cuminsa lanta cabes fuertemente y cu turismo di Aruba tambe ta creciendo  formalmente, ta expresionnan demasiado pura ya cu mester sigui analisa e situacion cu pandemia a causa y con ta bay atende cu esaki den e proximo dos añanan.

E encuesta di Banco Central ta duna un aspecto hopi impactante di e situacion aki na Aruba y ta dificil pa kere cu awor den e normal nobo cu ya ta avansando, tur hende cu a perde nan trabou lo haya esaki bek asina facil.

Hopi compania a dal nan porta sera, centro di Oranjestad ta hopi bandona mesun cos cu centro di San Nicolas, mientras cu malls den barionan, tambe por mira cu hopi negoshi a bandona e lugar cu nan tabata huur ya cu durante di e pandemia no tabatin cumprador, no tabatin mucho placa den circulacion y miles di hende a perde nan trabou.


Proceso pa yega na un Gobierno di coalicion ta inicia berdaderamente
Source:  AWEMainta
dinsdag 06 juli 2021 01:43

Ayera den oranan di merdia oficina di Gobernador a anuncia cu a nombra dos informador cu mester cuminsa reuni cu lidernan di partidonan politico cu a haya asiento, pa sondea e posibilidad pa yega na nombramento di un formador oficial.

A tuma algo mas c’un siman pa anuncia e informadornan aki kendenan a bira Tisa Lasorte y Eddy Werleman, kendenan awor lo inicia cu serie di reunion cu lidernan politico p’asina saca afo e posibilidad di un Gobierno di coalicion.

A base di e informacionnan acumula aki e ora e informadornan lo entrega nan raport na Gobernador pa nombra  e formado cu e ora lo inicia cu e tarea pa forma un Gobierno di coalicon den proximo simannan.

Despues di eleccion 2017 no tabata necesario pa nombra un informador caminda mesora a bay over na nombra e lider di MEP, Evelyn Wever Croes como formador, ya cu for di momento cu resultado di eleccion a bira conoci, tur hende tabata na altura cu tres partido cu ta MEP, POR y RED, ya caba a dicidi cu nan ta lo forma un coalicion lagando e partido mas grandi, AVP un banda.

Resultado di eleccion siman pasa a laga un scenario completamente diferente, caminda e partidonan cu a logra haya representacion den Parlamento, no a liga nan mes na un otro partido asina cu resultado a bira conoci.

Sinembargo ta keda varios posibilidad, caminda e prome cu t’esun cu lo por ta mas logico y cu pueblo a vota p’e, esta un Gobierno di coalicion di MEP y AVP, no ta posibel algo cu e lider di MEP a anuncia prome cu eleccion caba.

Partido MEP a keda cu tres opcion, caminda e por forma un coalicion solido di 14 asiento si e yega na un acuerdo cu MAS, RAIZ y Accion21, loke tambe ta mustra dificil, pero na mes momento e por yega nan un acuerdo cu sea RAIZ of MAS pa forma un coalicion di 11 asiento, aunke un posibel combinacion cu partido di Marisol Lopez Tromp, ta mustra sumamente improbabel.

Partido AVP tin solamente dos opcion, esta di forma un coalicion tambe cu tur tres partido chkito pa un coalicion cu sosten di 12 asiento of e por forma un coalicion cu MAS y RAIZ cu lo ta un coalicion cu 11 asiento.

Ta den e rumbo aki tambe e trabounan di informadornan Lasorte y Werlemen a inicia ayera y nan lo continua awe cu nan ronda di reunion p’asina mira con ta yega na un candidato cu mester bira e ora e formador oficial pa yega na un Gobierno di coalicion. Rumornan ta sigui circula den ultimo dianan riba desaroyonan cu mas tanto ta envolvi partido RAIZ, pero manera AWEMainta a wordo informa, nada di e rumornan aki ta basa riba berdad y cu no por bisa algo concreto ainda. Maske lider di RAIZ, Ursell Arends a duna  di conoce cu e siman aki, e lo duna su version rond di e formacion cu RAIZ lo desea di wak.


Cambio di orario Test Center na HOH
Source:  AWEMainta
dinsdag 06 juli 2021 01:42

Dr. Horacio E. Oduber Hospital conhuntamente cu LabHOH ta sumamente orguyoso di e trabounan increibel cu a ser efectua durante e temporada duro di Covid-19 cu a start na maart 2020.

Mirando cu a logra mantene e cifranan abou durante e ultimo lunanan cu a pasa desde ayera ta anuncia cu ta cambia orario di Test Center na HOH. Esaki pa motibo cu e demanda pa loke ta test pa Covid-19 tambe den comunidad a baha.

Desde ayera, 5 di juli 2021 e orario na Test Center HOH lo bira tur dia, esta di dialuna pa diadomingo  for di 8or di mainta pa 12or di merdia. 

Naturalmente Test Center HOH lo keda disponibel na momento di emergencia y un colega lo t’ey pa efectua e test di Covid-19.  Pa solamente emergencia por yama 597-4522. 

Pa loke ta LabHOH su Test Center na Palm Beach Plaza si ta keda disponibel diariamente for di 6or di mainta te cu 10 or di anochi. Bo ta bay biaha y mester haci un test no duda y pasa cerca nos na unda ta sigura cu mundialmente e resultado ta wordo acepta.  Dr. Horacio E. Oduber Hospital conhuntamente cu LabHOH kier gradici tur hende cu “behind the scenesâ€� a traha incansablemente pa combati e virus aki. Alabes kier recorda tur hende pa sigui cuida y mantene bo mes na higiena. Nos t’ey semper pa asisti bo persona y brinda e servicio cu bo merece. Pasobra bo salud, ta nos prioridad! 


N.V. Elmar a splica su banda di e black-out di diasabra y storing di diadomingo
Source:  AWEMainta
dinsdag 06 juli 2021 01:41

Na prome lugar N.V, Elmar ta pidi su disculpa na su clientenan pa cu e fayo den distribucion di coriente cu a tuma lugar pa cu e black-out di diasabra y storing di diadomingo. For di oranan di atardi Elmar a wordo notifica dor di WEB cu nan lo tin problema serio den nan planta cu lo por ocasiona cu basta area di Aruba lo por keda sin suministro di coriente.

Bao di guia di Director di Elmar sr. Anthony Irausquin y Asset Manager sr. Albertico Koolman, mes ora a mobilisa su tecniconan pa presenta na tur stacion p’asina ta prepara pa cualkier fayo cu lo por a presenta. Tabata casi 4’or di atardi ora cu Elmar a wordo notifica cu WEB a kita suminstro di coriente di “Elmar 2� cu ta suminstra area di Sta Cruz y becindario. Un par di minuut despues WEB ta kita sumistro di “Elmar 5 y 6� (area di Tanki Leendert/Pos Abao y Sabana Blanco).

WEB a avisa cu e chens lo ta grandi cu e lo interumpi suminstro di mas feeder. Un rato despues tabatin un black-out total.

For di e momento aki tur nan tecniconan tabata den comunicacion constante cu WEB p’asina haya e señal pa cuminsa suminstra coriente bek na nan clientenan.  

Segun WEB por a tuma load, Elmar poco-poco, riba peticion di WEB mes, tabata suministra coriente. Tabatin ocasion cu mester a kita bek suministro di coriente riba peticion di WEB mes p’asina preveni pa WEB hay’e den situacion serio atrobe.

Pa 8.20 a haya prome señal for di WEB pa cuminsa suminstra coriente via OS Balashi (Dieselstraat/Santa Cruz y becindario). Tecniconan di Elmar a keda pendiente y suministrando coriente te cu 5.15am (diadomingo mainta).

Diadomingo, 11 am, e prome problema cu a presenta tabata den area di Brazil, ocasiona pa un mata cu a causa corto circuito dor di biente fuerte, den waya di coriente cu a kima un transformator. Elmar mesora a atende cu e fayo aki y pa 1.20 pm tur cliente tabatin coriente.

Na Cumana tabatin 2 kabelstoring pa 5.15 pm. Esaki tabata ocasiona dor cu a pone extra load riba e kabelnan durante di e black-out. Elmar ta investigando e causa exacto di esaki.

Consecuentemente a surgi otro kabelstoring na SS Piedra Plat cu probablemente lo a wordo ocasiona pa mesun motibo extra load. Pa 5.35pm tur cliente tabatin coriente bek.

Elmar no tabata presente diadomingo n’e rueda di prensa yama pa WEB, como cu Elmar ta di opinion cu esaki tabata na WEB splica e suceso di black-out di diasabra. Elmar kier gradici tur su tecniconan cu a traha incansablemente pa suministra coriente bek na pueblo di Aruba.  


Angelo Alvarez ta empleado di luna mei
Source:  AWEMainta
dinsdag 06 juli 2021 01:40

Mensualmente Dr. Horacio E. Oduber Hospital ta reconoce un empleado di luna cu a destaca. Pa luna di mei Hunta Directiva a scoge Angelo Alvarez como e empleado cu a resalta. Ela keda hopi sorprendi ora el a yega piso despues di su examen di “Basic Life Support� unda cu tur su colega y famia a warda p’e yega. E no a spera esaki mes y den un ambiente ameno riba piso a celebra su reconocimento.

Zorgmanager di Cuido Intensivo, sr. Gino Paskel a splica cu asina cu el a pidi tur e coleganan riba piso ken pa nomina, no tabatin duda mes pa trece Angelo su nomber pa dilanti. Angelo ta un colega hopi atento pa pashent y nan famia y tambe pa su coleganan. E ta un persona simpatico, por papia hopi bon cu ne y semper positivo y cla pa pensa hunto riba solucionnan.

E ta un persona clave durante e pandemia cual tabata un periodo hopi duro, conectando e enfermeronan di exterior y e enfermeronan riba diferente piso pa traha hunto aunke di diferente cultura, caracter y habilidadnan.

E tin un dedicacion grandi pa su trabou y no solamente riba Cuido Intensivo, pero tambe riba otro piso yudando coleganan den cualkier manera. Ademas, e ta envolvi cu e HVT (Hulpverlenersteam) di Hospital y ta forma parti di e comision di calamidad. Gino ta conta cu e piso ta hopi contento y orguyoso di tin un colega proactivo y semper cla pa yuda y bay e ‘extra mile’.

Angelo ta un nurse specialisa riba piso di Cuido Intensivo, pero awor tambe tin un funcion nobo parcialmente como Avondhoofd. Normalmente e lo a mantene su mes mas ocupa pa yuda pensa riba nominacion di otro colega como empleado di luna. Nunca el a imagina di a sali empleado di luna, su mes, pues tabata un sorpresa grandi. 

Angelo ta conta cu e ta un nurse specialisa den cuido agudo, esta acute zorg. E nomber ta papia pa su mes, pasobra nan ta haya pashent cu ta yega hopi malo y tin di haya atencion medico mesora. Un profesionalismo hopi grandi, un conocemento hopi amplio, pasobra ta haya tur tipo di enfermedad den cuido intensivo di Aruba, desde mucha te hende grandi. Esey ta haci cu e trabou ta hopi “spannend� p’e y e ta gusta e trabou.

E ta gradici tur cu a yuda dun’e e sorpresa grandi aki, ya cu esaki ta algo cu e no lo lubida nunca. Tambe ta gradici su hefenan y e organisacion di HOH cu e ta traha p’e cu a percura pa yega unda cu e ta awor den su carera. Angelo t’e bibo ehemepl cu e pashent su cuido ta su prioridad! Pabien Angelo cu e bunita reconocimento aki bon mereci!


Kiwanis Club of Palm Beach a reconoce e “Terrific Kids of the Year� durante aña di pandemia
Source:  AWEMainta
dinsdag 06 juli 2021 01:39

Kiwanis Club of Palm Beach conhuntamente cu St. Dominicus College y St. Franciscus College, recientemente a anuncia e “Terrific Kids of the Year� n’e scolnan aki. E reconocemento aki t’e culminacion di e programa social yama “Terrific Kids� cu Kiwanis Club of Palm Beach ta sostene n’e scolnan menciona.

E pandemia Covid-19 a haci cu e aña escolar aki tabata uno dificil pa ehecuta e programa. No obstante, ambos scol a logra di finalisa henter e programa independientemente. Tabata solamente recien na juni cu e miembronan di Kiwanis por a bishita e scolan atrobe pa acompaña e ultimo actividadnan. Pesey un palabra di elogio especialmente ta bay n’e maestronan cu a guia  e programa durante e temporada dificial aki.

Kiwanis Terrific Kids ta un programa di reconocemento escolar cu ta promove desaroyo di balornan manera caracter personal, autoestima y perserverancia. E palabra “TERRIFICâ€� ta un abrevacion na Ingles cu ta consisti di e prome leternan di “Thoughtful, Enthusiastic, Respectful, Responsible, Inclusive, Friendly, Inquisitive and Capableâ€�.

Studiantenan den e programa ta traha cu nan maestro pa establece metanan pa mehora comportacion, contacto cu otro, presencia y/of trabao escolar. Terrific Kids ta un programa di Kiwanis International. Na Aruba, Kiwanis Club of Palm Beach ta patrocina e programa n’e dos scolnan menciona y esaki ta encera sosten di diseño di e programa, sosten financiero, guia y supervision.

Durante e aña escolar tin diferente reconocemento intermediario y na final di e programa, na luna di juni, ta reconoce e “Terrif Kids of the Yearâ€�. E alumnonan aki mester logra por lo menos 7 di e 8 leternan di e palabra “TERRIFICâ€� durante e aña. E celebracion ta ensera anuncio di e ganadornan, otorgamento di e reconocemento y sacamento di potret. Despues tin un celebracion grandi cu cuminda y bebida caminda ta participa e alumnonan cu a participa, e maestronan y miembro di Kiwanis Palm Beach.  N’e occacion aki e ganadornan ta ricibi nan certificado especial di “Terrific Kid of the Yearâ€�.

Durante aña escolar 2020-2021 a participa un total di 265 mucha na St. Dominicus College y 192 na St. Franciscus College. Un gran pabien di parti di Kiwanis Club of Palm Beach ta bay na tur mucha cu a participa y e staf maestro cu a contribui. Un pabien especial ta bay n’e 31 alumno di St. Dominicus College y e 26 alumno di St. Franciscus College cu a logra obtene e certificado maximo di “Terrific Kids of the Year� 2020-2021. Tambe e scolan a scoge dos ‘TK Teachers of the Year’. E maestronan aki a resulta di ta pa St. Dominicus College: Sra. Liza Maldonado-Oduber y sr. Mario Lobo; y pa St. Franciscus College: Sra. Souell Maduro y sra. Rosalinda Hayer. Finalmente un palabra di pabien ta bay n’e cabesantenan di e scolnan, respectivamente sra. Caroline Cardose (St. Dominicus College) y sra. Nadine Kirindongo (St. Franciscus College). Riba e potretnan adhunto por mira maestro, alumno y miembronan di Kiwanis Club of Palm Beach n’e clebracion final.

Mas informacion riba e programa por haya riba e a Facebook fan page di e scolnan respectivamente pa St. Dominicus College: https://www.facebook.com/Dominicuscollege-Basisschool-435829879931141 y pa St. Franciscus College: https://www.facebook.com/StFranciscusCollege


<< < Vorige 1 2 3 4 5 6 7 8 9 Volgende > >>