VicksWeb upgrade Location upload ads trending
VicksWeb Aruba

Welkom bij VicksWeb™

Flag Counter

© VicksWeb Inc.

Over | Privacy | Hulp | Voorwaarden | Feedback | Beveiliging | Diensten

Pago instantaneo awor ta disponibel na Aruba
Source:  NoticiaCla
maandag 27 januari 2020 16:21

(ADVERTORIAL) ORANJESTAD – Despues di un ‘go-live’ exitoso dia 18 di januari 2020, den cooperacion estrecho cu e banconan comercial, Banco Central di Aruba (BCA), den su funcion di ‘clearing house’, ta anuncia cu un infrastructura di pago instantaneo nobo awor ta disponibel na Aruba. E solucion di pago instantaneo nobo aki yama I-Pago, e marca pa servicionan di pago instantaneo local. I-Pago ta un paso importante den e modernisacion di e infrastructura di pago di Aruba. Awor por hasi pagonan mes lihe y facil cu placa cash, bahando duracion di transaccion significantemente, reduciendo incertidumbre di pago y di e manera aki promoviendo transparencia. HISTORIA Na aña 2016, BCA a invita diferente ‘stakeholder’ pa tende nan punto di bista riba Aruba su infrastructura di pago. Practicamente tur ‘stakeholder’ a expresa nan deseo pa mira mehoracion den e infrastructura di pago, y tabata habri pa modernisacion, automatisacion, y un reduccion den metodonan tradicional di pago. Adicionalmente, BCA a inclui den su plan strategico ‘Bela Yen – Nos Plan Strategico 2016 – 2020’ plannan pa expande BCA su tareanan den e area di pago, pa asina contribui na e modernisacion di e sistema di pago. I-Pago ta awor e prome paso den esaki.  E implementacion di I-Pago ta encera e cambio di e sistema anterior di ‘Clearing and Settlement’ (Onnet) pa un solucion nobo pa procesa transaccionnan bancario instantaneamente. Desde awor, ta procesa pagonan na florin entre banconan na Aruba den un manera instantaneo, 24 ora pa dia, 7 dia pa siman, henter aña. Cu e introduccion di I-Pago, ta eleva Aruba su infrastructura di pago na un nivel di acuerdo cu e miho  practicanan internacional existente,  mehorando asina su eficiencia, confiabilidad y seguridad. E TARIFA Basa riba su inversionnan y tambe un aproximacion di e volumen di transaccionnan, BCA actualmente ta cobra e banconan comercial un tarifa nobo pa transaccionnan interbancario di acuerdo cu e siguiente structura di prijs: Tur transaccion bou di Afl. 250 ta gratis, mientras cu pa cada transaccion riba Afl. 250 un tarifa di Afl. 0.70 lo wordo cobra. Cu e structura di tarifa aki, BCA kier stimula e uzo di I-Pago.    Banconan participando cu I-Pago ta: -           Aruba Bank N.V. -           Banco di Caribe (Aruba) N.V. -           Caribbean Mercantile Bank N.V. -           FirstCaribbean International Bank (Cayman) Limited – Aruba Branch -           RBC Royal Bank (Aruba) N.V.    

DIP a coregi parti di lista di kavel pa carnaval 2020
Source:  NoticiaCla
maandag 27 januari 2020 15:35

ORANJESTAD - Como cu DIP su meta prinicipal ta pa brinda un servicio basa riba intregridad y transparencia, awe DIP ta republica e lista di Vent Kavel y Kavel regular. Esaki ta despues di algun jamada cu DIP a ricibi di algun persona cu a bin na remarke pa un kavel, pero no a wordo publica den e prome lista.  Mester menciona cu e departamente concerni a bay revisa e transmicion, y enberdad a nota cu algun persona cu a bin na remarke, y pa un motibo of otro un eror a wordo cometi, y notario a kere cu nan nomber a sali caba. Manera e maneho ta describi, un persona cu su nomber of adres a sali caba, no por bin na remarke pa sali 2 biaha. DIP kier a pidi un disculpa pa e eror cu a wordo cometi, pero sigur no kier a perhudica ningún persona cu a tuma nan tempo pa cumpra un peticion pa bin na remarke pa un kavel.  Diasabra 1 y diadomingo 2 di februari, DIP lo cuminsa entrega e permiso y documente necesario na esnan cu a bin na remarke pa un kavel. Please tuma nota di e procedura cu lo tuma lugar. Procedura pa scohemento di kavel na DIP. Promer dia, diasabra, 1 di februari 2020, cuminzando for di 8.00 a.m. en punto.   Promer dia, diasabra, 1 di februari 2020, cuminzando for di 8.00 a.m. en punto.    1) tur buffetvergunning pa districto di Oranjestad.    2) number 1 te cu number 50 (trailer/tent/stellage).    3) pauze y ta sigui pa 1pm exacto.    4) tur buffetvergunning pa districto di Noord y San Nicolas    5) number 51 te cu number 100 (trailer/tent/stellage).  Segundo dia, diadomingo, 2 di februari 2020, cuminzando di 8.00 a.m. en punto.   1)number 101 te cu number 160 (trailer/tent/stellage).   2) pauze y ta sigui pa 1pm exacto.   3) number 161 te cu e ultimo number 180 (trailer/tent/stellage).   4) Lo sigui di biaha cu RESERVE Kavels nan di nr 1 te cu nr 45. E persona cu yega laat ta perde su turno y lo mester keda warda te despues cu yama e ultimo persona prome cu pauze of prome cu cuminza cu e 50 siguiente personanan of despues cu yama e ultimo persona pa e dia ey. Personanan cu tin buffetvergunning pa districto di Noord y San Nicolas por cuminza pone nan trailer of tent desde diaranson, 3 di februari 2020, pa districto di Oranjestad tambe por cuminza pone nan trailer of tent desde dialuna dia 3 di februari 2020 (entre 7.00 a.m. y 7.00 p.m.). DOW lo instala tent riba e kavelnan na L.G. Smith Boulevard pa personanan cu a bin na remarca pa e kavelnan aki pa medio di tombola. Riba dicho kavelnan no ta permiti pa para auto, pone stellage of trailer ni cualkier otro objecto cu por trece daño na e suela. Tambe lo tin tribuna disponibel riba e ruta pa facilita personanan cu no a bin na remarca pa kavel y/of ta desea pa hasi uso di un tribuna pa disfruta di Carnaval. Pa esakinan no ta existi ningun tipo di reservacion. Esun cu yega prome por tuma asiento riba e tribuna. Tambe lo tin mas o menos 7 toilet trailer instala riba e ruta di carnaval pa facilita e publico.  

Lo asfalta caminda di rotonde di AAA pa rotonde di FCCA
Source:  NoticiaCla
maandag 27 januari 2020 15:28

ORANJESTAD - Departamento di Obra Publico ta informa pueblo di Aruba en general y specialmente nos automobilistanan cu ta haci uzo di e caminda di Edgar Watty Vos Blvd cu diamars dia 28 di januari  2020 te cu diahuebs dia 30 di januari 2019 lo bay cera e caminda pa haci trabounan preparativo y asfalta e caminda. E caminda cu lo asfalta ta for di rotonde di AAA te cu rotonde di FCCA. E trabounan preparativo ta tuma lugar dia 28 y dia 29 di januari 2020 y e asfaltamento lo tuma lugar dia 30 di januari 2020. Ruta alternativa lo keda indica cu baricadanan y borchinan di aviso y e orario di ceramento lo ta di 7’or di anochi te cu 12’or di marduga.En conexion cu e trabounan menciona Departamento di Obra Publico ta pidi pa tene cuenta cu e inconveniencia cu lo por surgi pa cual nos ta pidi nos disculpa.

DVG ta desmenti caso confirma di corona virus na Aruba
Source:  NoticiaCla
maandag 27 januari 2020 13:23

ORANJESTAD - Rumornan ta circulando cu na Aruba tin un posibel caso di Coronavirus confirma. Como Departamento responsabel pa salud di comunidad DVG a clarifica cu esaki no ta berdad. " Departamento di Salud Publico ta un organo transparente y profecional cu ta traha pa cuida salud di Aruba. Como departamento responsabel, nos lo no sconde ninguninformacion pa nos comunidad. Un comunidad bon informa lo ta bon prepara pa cualkier situacion cu por presenta y esaki ta loke Departamento di Salud Publico ta haci, door di informacomunidad riba tur risico cu por presenta"   Ademas a invita pueblo di Aruba pa sintonisanos conferencia di prensa programa pa mayan dia 28 di januari 2020 pa 8:30 di mainta unda lo duna un “update” riba e ultimo desaroyonan rond di Novel Coronavirus y con Aruba ta prepara pa esaki.

Darlaine Guedez y Dellanire Maduro a huramenta como Parlamentario
Source:  NoticiaCla
maandag 27 januari 2020 13:10

ORANJESTAD - Manera anuncia awe mainta Gobernador di Aruba, S.E. Alfonso Boekhoudt, a huramenta Dellanire Maduro y Darlaine Betzabeth Guedez Erasmus como miembronan di Parlamento. E huramentacion a tuma luga na Cas Ceremonial di Gobernador den presencia di entre otro, Presidente di Parlamento, Prome Minister, Griffier di Parlamento y famia di e miembronan di Parlamento huramenta. Potret cortesia Kabga

Aruba a haya luz berde di Hulanda pa trata presupuesto 2020 otro luna
Source:  NoticiaCla
maandag 27 januari 2020 10:55

ORANJESTAD – Gobierno di Aruba a haya luz berde di Hulanda pa trata presupuesto 2020 na luna di februari envez di januari 2020 manera cu tabata e palabracion inicial cu Hulanda. Asina prome minister Evelyn Wever Croes a bisa den conferencia di prensa dialuna mainta. E palabracion cu Hulanda tabata cu pa januari 2020 mas tarda mester a trata e presupuesto, y basa riba e contenido final, e colegio di supervision financiero CAFt lo mester a duna su comentario y si e tabata ok, e ora lo a kita e aanwijzing cu tin riba mesa 'ainda', definitivamente. Pesey tabata importante pa Hulanda duna su aprobacion pa e presupuesto por wordo trata mas laat, sin cu Aruba ta haya problema despues. E mandatario a confirma na noticiacla.com cu dialuna mainta e tabatin contacto cu Raad van Advies riba e presupuesto. E presupuesto ainda ta na Raad van Advies y unabez cu nan ta cla cu ne, e por bay gobierno bek pa nan manda e presupuesto e ora pa Parlamento. Unabez eynan, e proceso ta cuminsa core unda cu mester duna Parlamento e tempo necesario pa por haci pregunta y trata esaki. Wever no ta kere cu ta problema, mirando cu CAFt a wak e presupuesto caba, y a duna su comentario ariba, te cu gobierno ta trahando su reaccion bek pa e colegio di supervision financiero.  

Diamars Marisol Lopez Tromp ta huramenta atrobe como minister
Source:  NoticiaCla
maandag 27 januari 2020 10:34

ORANJESTAD – Ex Parlamentario Marisol Lopez Tromp ta huramenta como minister ‘nobo’ di gabinete Wever Croes diamars mainta 11'or . Asina prome minister Evelyn Wever a confirma dialuna mainta durante un conferencia di prensa. E mandatario a bisa mes momento cu e mes a tuma retiro como minister cu e consecuente carteranan pa asina habri caminda pa Lopez Tromp por huramenta sin problema diamars. No ta prome biaha cu Lopez Tromp ta bira minister ya cu den pasado el a carga e cartera caba di e.o. infrastructura. E ta asumi su funccion como minister pa partido POR.   

Stichting Parkietenbos a logra colecta 710 firma contra contaminacion
Source:  NoticiaCla
maandag 27 januari 2020 10:04

ORANJESTAD - Diadomingo ultimo Stichting Parkietenbos a tene su promer actividad di coleccion di firma pa protesta contra contaminacion di nan barionan. Asina e fundacion a informa dialuna mainta. Segun e fundacion, for di 9 or di mainta te cu 2 or di atardi por a bishita e Centro Deportivo Simeon Antonio pa firma e lista. Na final di e dia un total di 710 firma a ser colecciona. Awe e campaña online ta cuminsa via di Facebook. EXITO Stichting Parkietenbos ta considera e promer dia un exito pero alabes e directiva ta sinti un urgencia mas grandi ainda pa exigi di Gobierno atencion inmediato pa resolve e contaminacion cu ta bin di Seri Teishi y e kimamento na Dump di Parkietenbos.  SUFRI Segun e fundacion, hopi hende cu ta sufri di diferente malesa a acudi na e accion di firma; esnan cu alergia, wowo malo, garganta malo, nanishi malo y astma. Tambe hopi hende grandi cu ya ta sufri di un otro malesa nan salud a bay mas atras pa motibo di e gasnan toxico y holor stinki cu ta sali di Ser’I Teishi y e Dump di Parkietenbos.  MOLESTER DI KIMAMENTO Kimamento di tire ta un di e molesternan cu tambe hopi habitante a keha di dje. Ora di kima tire ta gasnan hopi toxico manera Dioxine ta ser manda den aire cu ta canceroso. Den e siguiente simannan e accion pa colecciona firma lo sigui online y na diferente establecimento.

Hogeschool Rotterdam ta informa studiantenan den examenklas y esnan sin diploma tocante 21+ Toelatingstraject y e programma nobo di Subi Jet pabo Get 2020 dialuna awo!
Source:  Cool FM 98.9 Aruba
maandag 27 januari 2020 08:32

Pa medio di esaki Hogeschool Rotterdam kier a informa tur studiantenan di examenklas y nan mayornan como tambe studiantenan cu tin interes pa participa na e 21+ traject pa e unico anochi di informacion caminda e siguiente dos topiconan lo wordo trata:

  1. 21+ Traject di Hogeschool Rotterdam

 

Bo NO tin bo HAVO/VWO/MBO diploma pa bo por drenta un HBO y sigui e opleiding cu semper bo tabata kier y bo tin e dedicacion y determinacion pa sigui studia? Esaki ta BO chance, awo Hogeschool Rotterdam ta brinda bo e oportunidad pa participa na nos 21+ Toelatingstraject aki na Aruba mes! E trajecto aki ta consisti di un aanlegtest y maximo 4 toelatingsexamens. Si bo completa e trayecto aki cu exito, bo por drenta Hogeschool Rotterdam pa cuminsa e HBO opleiding di bo escogencia na september 2020 mes!

Pa por participa na e trayecto aki, bo mester tin e edad di 21 aña of mas riba 1 di October 2020.

 

  1. “Subi Jet Pa bo Get� pa kandidatonan cu ta den examenklas cu lo bai studia na Hogeschool Rotterdam na augustus 2020

 

Bo ta den examenklas y tin pensa di bai studia un opleiding na Hogeschool Rotterdam na September 2020? Esaki ta BO oportunidad pa por participa na un curso completamente revisa y cu informacion hopi interesante, interactivo y leuk pa prepara abo y bo mayornan pa e paso nobo aki den bo bida. Nos lo lagabo sera conoci cu studentcoaches y docentenan cu por judabo den e preparacion y cu tur bo preguntanan. Un punto hopi atractivo di tur esaki ta cu participando na e curso informativo aki bo por acumula bo prome studiepunten prome cu bo jega Hulanda. Un oportunidad cu Hogeschool Rotterdam SO ta brindabo na Aruba. Tene na cuenta cu esaki tambe ta pa esnan cu lo kier sigui e 21+ traject!

 

Pa mas informacion nos kier a invita tur interesado pa bin e unico anochi di informacion cu lo tuma lugar:

Dia:                Dialuna 27 di januari 2020

Info 21+:        5:30 – 6:30 pm

Info Subi Jet:  6:30 -7:30 pm

Lugar:              EPI Auditorium Oranjestad

Check out:

Website:           http://www.hogeschoolrotterdam.nl/21-jaar-of-ouder-zonder-diploma

FaceBook:        http://www.facebook.com/pages/HR-Toelatingstraject-21-Cura%C3%A7ao-en-Aruba/490071011013816

Contactpersoon HR Aruba

Email:  toelatingstraject21aruba@gmail.com

             subijetpabogetaruba@gmail.com


Dialuna mainta Maduro y Guedez ta huramenta como Parlamentario
Source:  NoticiaCla
maandag 27 januari 2020 02:37

ORANJESTAD - Dialuna mainta pa 11'or, Gobernador Alfonso Boekhoudt ta huramenta Darlaine Guedez Erasmus (MEP) y Dellanire Maduro (POR) como e proximo Parlamentarionan pa pais Aruba. Asina prome minister Evelyn Wever a confirma riba su pagina di Facebook. Despues lo huramenta Marisol Lopez Tromp (POR) como minister nobo. Guedez ta reemplasa Luigi Bergen como parlamentario, despues cu Bergen a retira debi cu tin investigacion hudicial contra su persona, y Maduro ta reemplasa Lopez Tromp cu ta bira minister, despues cu Otmar Oduber a retira di e funcion ey na december ultimo, debi pa motibo di salud y tempo pa famia. 

<< < Vorige 1 2 3 4 5 6 7 8 9 10 Volgende > >>